Bul ṭan fuh Juventus

Juventus chuan Pathianni zan khan tun season atana an Serie A match hmasa ber an khel a, an mikhualna ramah Udinese chu 3-0 in an luhchhuah a, point thum hmu nghalin bul an ṭan fuh hle.

Udinese muala inkhelah Old Lady tan Federico Chiesa chuan goal hmahruai a khung a, striker Dusan Vlahovic-a'n penalty aṭanga an goal hnihna a khung bakah Adrien Rabiot chuan chak a nemnghet bawk.

Massimiliano Allegri naute hi season hmasa khan khelmual chhung leh pawnah an talbuai, kuminah erawh a bul an ṭan ṭhat avangin beisei an nei sang ngam tawh ang, hmabak hlenchhuah tur erawh a hautak dawn.

Nikum lama hliam vanga an chhawr mumal theih loh Chiesa a dam chiang tawh. Italy international chuan, "Coach-in min khelh tirna kha a nuam ka ti, striker Vlahovic hnung chiaha tlan kha a nuam hle.

"Taksa lamah harsatna ka nei tawh lo a, tunah chuan hmalam hun ka thlir thei tawh a ni. Kan squad-ah hian theihna nei sang tak tak an awm, chuvangin kan tho chhuak leh ngei ang tih hi ka ring tlat a ni," a ti.