Gauff tan nomawi hlu ber

Coco Gauff chuan Karolina Muchova hnehin Cincinnati Open champion a ni. American tleirawl duhawm Gauff tan chuan tun ṭuma 1000 Masters title a lak hi a nomawi chawi tawh zinga hlu leh ropui ber a ni.

Pathianni zana final inkhelah Gauff hian Czech Repubic nula Muchova hi 6-3, 6-4 in a hneh, final kalkawngah hian world number 1 Iga Swiatek chu a lo hneh tawh bawk a, tun ṭumah hian champion a phu hle.

Kum 19 mi Gauff chuan, "Europe khawmualpuiah nipui kan hmang zo chauh a ni a, keimahni ram lama hlawhtlinna ka chang zui thei hi ka lawm. A nihna takah chuan tun ṭumah hian champion chu duh mah ila ka inbeisei ngam lo.

"Season tir lama ka chet fuh tawk lohna laite ka ennawn a, a bik takin Wimbledon khelh zawh takah khan hneh nei loin ka tla. Ka tih fuh tawk loh laite ka siamṭha thei hi ka lawm tak zet a ni," tiin a sawi.

Gauff hian khawvel hriat a hlawh hma a, kum 20 a tlin hmain tennis huangah chuan a hming a langsar tawh hle. Tennis a khelh hun chhungin nomawi panga a chawi tawh, tun season bikah pathum a chawina a ni bawk.

Cincinnati Open hma hian Washington DC leh Auckland-ah te hlawhtlinna a lo chang tawh bawk. Bianca Andreescu (2019) hnu lamah kum 20 tlin hma a, season khat chhunga WTA titles pathum la tling leh thei hmasa ber a ni.

Grass court inelna lian Wimbledon-ah khan Gauff hi hneh nei loin a tla, a hnu lamah erawh match 12 khel leh tawhin vawi khat chiah chak loh a nei, a kum la naupang deuh mah se tunah chuan a puitling chho ta hle ni pawhin a lang.

August 28 aṭanga September 10 chhungin US Open khelh a ni dawn. American mipuite chuan Gauff hi an ṭan rawn dawn. Serena Williams leh Venus Williams te hnuah chuan hmeichhe player zinga an beisei neih sanna a ni mek.