A kim loin Arsenal an chak

Champion tur chuan khelh ṭhat loh nia point thum hmuh theih a pawimawh an ti ṭhin - Arsenal hian Premier League nomawi chawi ngei an tumruh hle a, fiahna an hmachhawn hmasak ber chu an paltlang phawt.

Mikel Arteta naute hian Crystal Palace chu 1-0 in an hneh hram, goal awmchhun hi captain Martin Odegaard-a'n penalty aṭanga a khung niin, defender Takehiro Tomiyasu hnawhchhuah a nih hnuah Gunners an bet hle a, mahse an ṭang tluan thei.

Premier League an ṭan chauh a, match hnih an khelh tawhah team pathum - champion lai Manchester City, Arsenal leh Brighton & Hove Albion te chu chak ve ve thei an ni; midang zawng chu chak loh leh inhnehtawk nei tawh vek an ni thung.

Arsenal hian tun kar tawpah Fulham an mikhual dawn a, international break awm hmain Emirates Stadium-ah Manchester United nen an inkhel bawk ang. United an tum hma ngeiin team nghet tak neih a pawimawh dawn.

Chakna penalty

Striker Eddie Nketiah-a'n a hun ṭha hmasa pahnih a chhawr ṭangkai lo. Bukayo Saka-a'n chep tak kara a ball pek chu ṭha takin a la lut a, mah se keeper Sam Johnstone dan phak lohah pet mah se goal banin a lo dang hlauh.

Declan Rice pawhin Nketiah tan ball duhthusam a pe, mahse English striker hian a pet over! Freekick an pet dawnah erawh Nketiah a che fuh thung - Palace player inrin kim hman hmain a tlan thut a, box chhungah an lo titlu.

VAR hman a nih hnuah penalty pek an ni. Ball kengtu Saka-a'n captain Odegaard hnenah ball a pe a, Norway international hian chakna goal awmchhun khung turin harsatna a tawk lo, goal kilah tak a khung.

Red card

Arsenal lamin ball theh (throw) tur an nei, ball la hmasatu Kai Havertz-a'n theh mai loin Tomiyasu a pe chhawng. Japanese defender hian hun la rei lo angin lang mah se muang lui nia a lan avangin yellow card hmasa zawk a hmu.

Palace hmanraw hlauhawm Jordan Ayew a pawh zeuh avangin Tomiyasu-a'n card pahnihna a hmu nawn. Direct red card a nih loh avangin EPL danah VAR a hman theih loh, minute 67-naah Arsenal an kim lo ṭan. Match 41 hnua Arsenal-in red card an hmuh leh hmasak a ni.

Arteta-a'n an kim loh hnuah defender Gabriel, Jakub Kiwior, Oleksandr Zinchenko leh midfielder tawnhriat nei ṭha Jorginho te a dah lut a, hun tawp dawn lamah Palace goal nawr na viau mah se Gunners tlarhnung an ding khawng tlat.

Arsenal thar

Season hmasa khan team hmuhnawm an ni a, player rinrawl leh khel tam bik pawh an awm. Mahse, player thar Rice, Havertz leh Jurrien Timber te an nei a, an khelh dan phung a dang hret, keeper thar David Raya erawh a la khel lo.

Timber a inhliam avangin Tomiyasu chu a hnung sirah dah a ngai - Zinchenko a dam tawh avangin an ngaihtuahawm tawh lo ang. Rice pawhin match hnih an khelh tawhah khelh dan phung pahnih nei nghal mah se a thiam ngal.

An khingpuite box bul vela ball kang inchuhah Arsenal an ṭha tawk lo ṭhin, 6 ft 4 in a sang Havertz-a'n an buaina pakhat hi a rawn sukiang viau. Mahse, Germany international hian Arsenal goal nawr a la pui na tawk lo, season hmasa an game kal fuh ang kha kan la hmu rih lo.

A hnung siksawi

Gabriel hi season hmasa khan EPL match 38-ah a khel vek, tun season erawh match hnih an khelh tawhah bul a la ṭan lo ve ve. Brazilian defender hi Real Madrid nen sawizawm a ni a, Saudi Arabia aṭangin sawmna a dawng bawk - mahse hralh an tum lo thung.

Arteta-a'n amah zirtirtu Pep Guardiola entawnin tlarhnung siksawi nasat a tum niin a lang. Thomas Partey chu a hnung sirah dah ṭhin a ni, khel ṭha viau mah se defender a nih lohna a lang zeuh zeuh; Eberechi Eze laka penalty a chawi lo chu a vannei hle.

Hei erawh a chiang - William Saliba hi a dam ṭha a nih phawt chuan thlamuanpui tham a ni. France international defender hi a nghet ṭha êm êm a, hliam nei loa season a hman tluan theih a pawimawh khawp ang, mawhphurhna a nei sang dawn.

Palace-in penalty pawm har an ti!

Inkhel ṭan hmain Roy Hodgson-a'n an khingpui tur Arsenal chu team ṭha an nih thu a sawi a, khawvel huap pawha player ṭha tak tak an kawl thu a sawi. Team ṭha an hmachhawn avangin a naute pawh a rem fimkhur takzet a ni.

English manager hian goal venhim a ngaipawimawh, a nihna takah chuan Gunners lakah khan an tlarhnung a phui ṭha, tihsual zeuh pakhat an neih chu an tuar - penalty an beisei ve pek an nih tak loh avangin a na ngei ang.

Eddie Nketiah-a'n ball a um hma khan Palace midfielder Jefferson Lerma chuan lo dan a tum, mahse Thomas Partey-a'n a lo titlu. Penalty an chawi dan leh an hlawh ve loh chungchang sawiin Hodgson chuan, "Penalty kan chawi dan kha a fuh lo.

"Video replay ka ennawn leh a, penalty kan chawi hma khan kan player pakhat kha a tlu hmasa, tlu der ni loin tihtluk ngei a ni bawk," a ti. Palace hian August 26, Inrinni zanah Brentford an lenchilh leh ang.

An khelh danah Arteta a lawm

Arsenal manager Mikel Arteta chuan an duhthusam ang vekin thil a thleng thei bik lo tih a sawi a, chutihrualin harsa taka point thum an hlawhchhuah theih avangin a lawm tih a sawi bawk.

Arteta chuan, "Loh theih lohna avangin player siksawi a ngai, bench aṭanga lutten an hna tur ang tak an thawk thei khan min tilawm. Kan chunga thil thleng leh thutlukna chu engpawh ni rawh se, hnehna chan tumin kan bei a, kan chak thei kha a lawmawm.

"Crystal Palace khelmuala inkhelh hi chu a harsa ṭhin, khualmuala goal kan chhuah lote hian min tilawm hle," a ti. An match hmasa zawka Nottingham Forest laka hun tawp dawna goal an chhuah chuan a tiharh tih a sawi bawk.

Thawhṭanni zan hi Arsenal tan anchhia a ni ṭhin - Arteta kiahhruaina hnuaiah, khualmuala Thawhṭanni zana EPL an khelh hmasak paliah an tlawm vek. Tunah chuan an record chhe tak hi an thai bo thei ta chiah a ni.