Alcaraz leh Djokovic an inhnaih

Mipa tennis thuneitu sang Association of Tennis Professionals (ATP) chuan Thawhṭanni zan khan world ranking a ti chhuak thar a, number 1 Carlos Alcaraz leh amah hnaih bertu Novak Djokovic inkarah point 20 chauh a awm.

Tournament an khelh hnuhnung ber Cincinnati Open-ah player ṭha pahnih hian nomawi an inchuh a, inkhel hmuhnawm takah Djokovic a chak. Serbian star hian ranking point 1000 lai hmuh belhin a dinhmun a siamṭha ta dawrh a ni.

Season hmasa khan Djokovic hi US-ah a inlan lo, chuvangin US bikah kumina tournament a khelh hoah chuan ranking point hloh leh venhim tur a nei lo, a khelh apiangah a hmuh belh zel.

August 28 aṭangin US Open an khel dawn, a match hmasa berah Djokovic hi a chak a nih chuan world number 1 a ni thei dawn. Champion lai Alcaraz erawhin US Open aṭanga point 2000 a neihsa humhim tura a beih a ngai thung dawn a ni.