Durand Cup 2023 - a thiam pariat a hriat ta

Indian football season bul ṭanna Durand Cup 2023 quarterfinal khel tur a hriat kim ta a, team pariat zinga paruk chu Indian Super League club an ni a, I League club Gokulam Kerala leh sipai club Indian Army an tling bawk.

Indian Army hian Thawhṭanni zan khan Rajasthan United chu 0-0 in an inhnehtawkpui a, match thum an khelh aṭanga point sarih neiin, group F hmahruaitu an ni a, quarterfinal an lut.

Tun inelnaah hian ISL club 12 tehmeuhin inelna hmachhawnin, I League club panga an tel bawk a, I League second division club pakhat, regional league club pakhat, Indian Armed Forces aṭangin club pathum leh ram pawn club pahnih an tel.

A tawpah chuan ISL club-te chungnunna langin, club paruk ngawtin quarterfinal an lut a, hetihrual hian champion lai Bengaluru erawh group stage-ah an zinkawng a tawp thung. Ram pawn aṭanga he inelna hmachhawn pahnih Bangladesh Army leh Nepal Army Club tan pawh inelna a la hautak hret a, knockout round an lut thei lo.

A kalphung

Durand Cup-a team teal zawng zawng hi 24 niin, club-te hi group parukah, team pali zel awma ṭhen hran an ni. Group tina a tiṭha ber chu quarterfinal lut chiang an ni a, pahnihna tiṭha zual pahnihte chu a thiam pariat zingah an tel ve bawk.

Quarterfinal lut zingah East Bengal, Mumbai City, FC Goa, Chennaiyin, NorthEast United leh Mohun Bagan chu ISL club an ni a, Indian Army chu sipai club zinga quarterfinal lut niin, Gokulam chu I League aṭanga lang an ni.

Inelna hi league angin home & away-a khelh a ni lo a, Kolkata, Guwahati leh Kokrajhar-ah te khelh a ni - group hrang hrang hian khawpui khelhna bik ṭheuh an nei a, quarterfinal bik hi Indira Gandhi Athletic Stadium, Guwahati leh Salt Lake Stadium, Kolkata-ah khelh a ni ang.

India rama football thuneitu sang ber All India Football Federation (AIFF) hriatpuinain Durand Football Tournament Society chuan Durand Cup hi a buatsaih a, Indian Armed Forces (Eastern Command), West Bengal sorkar leh Assam sorkarte chu inelna buatsaihtu zingah an tel.

A hming David-a

Durand Cup khelh mekah hian Mohammedan SC striker David Lalhlansanga chuan goal ruk khungin top scorer a ni mek a, mahse, group stage-ah an tlak avangin Vairengte tlangval hi top scorer a ni thei kher lo mai thei.

David-a hnuaiah hian goal li khung tawh FC Goa forward Noah Sadaoui, Mumbai City striker Jorge Pereyra Díaz leh NorthEast United forward Parthib Gogoi te an awm a, an la tlak loh vek avangin David-a lehpel thei dinhmunah an ding vek.

Mohammedan-in quarterfinal an luh loh dan hi a uiawm hle - match thumah vawi hnih an chak a, pahnihna ti ṭha pahnihah an tel teuh hle. Mahse, Mohun Bagan chuan point ruk tho hmu mah se, goal khat leka an goal difference a ṭhat zawk avangin Mohammedan aiah an tlang.

Durand Cup-ah hian goal khung tam ber (Golden Boot) lawmman dawngtu chuan cheng nuai thum a dawng dawn - David-a hian a dawng mai ang em, sawi theih a ni lo. Season hmasa khan goal sarih khungtu, Mumbai City forward Lallianzuala Chhangte chu top scorer a ni.

Mizo an tam

Durand Cup hi ISL club ṭhenkhat chuan reserve player-te enchhin nan an hmang a, hetihlai hian club ṭhenkhat erawhin season thar ISL inpuahchah nana hmangin, an neih ṭhat ber ber an thawhchhuahpui thung.

Professional club kan tih, sipai club ni lo aṭanga Durand Cup hmachhawn hi Mizoram player 27 zet an awm a, anni bakah hian Indian Air Force, Indian Army leh Indian Navy ten Mizo player kawl an nei bawk.

Hmarchhak aṭanga I League club hmasa ber Shillong Lajong-in ṭum dang ang lo takin Mizo player kawl an nei lo a, Jeje Lalpekhlua khelhna hlui Chennaiyin leh Kerala Blasters chu ISL club zinga Mizo player nei lo an ni.

ISL club Odisha-in an senior squad-ah Mizo player 10 ngawt kawl mah se, Durand Cup-ah erawh reserve team an khelhtir avangin Mizo player inlan an awm miah lo. Mizote kan ṭhat tawk lohna nia sawi fo ṭhin si ban nghakah Mizo player pahnih an inlan a, Lalbiakhlua Jongte (Mohammedan) leh Zothanmawia (Gokulam) te an ni.

A hmawr bawkna

Nimin lamah Durand Cup hi group stage match khelh zawh a ni a, nimin inkhel result hian quarterfinal lut turah nghawng a nei tawh lo. Ruahman dan chuan September 3-ah final khelh tur a ni dawn a, semifinal aṭang chuan Salt Lake Stadium, Kolkata-ah vek khelh a ni tawh ang.

Durand Cup-ah hian lawmman atan cheng nuai 89 sem ral a ni dawn a, champion team chuan cheng nuai 50 an dawng ang a, pahnihnain nuai 30 an dawng dawn bawk. Mimal lawmman dawngtu pathum hnenah nuai thum ṭheuh pek a ni dawn bawk.

Mimal lawmmanah hian goal khung hnem ber bakah goalkeeper ṭha ber (Golden Glove) leh player khel ṭha ber (Golden Ball) te chu lawmman pek an ni dawn a, anni pawh hian top scorer ang thoin nuai thum an dawng dawn a ni.

Quarterfinal hi August 24, Ningani aṭanga khelh ṭan tur niin, match hmasa berah NorthEast United leh Indian Army te semifinal luh inchuhin an inkhel ang.