Chelsea-in MLS club keeper la dawn

Chelsea chuan MLS club New England Revolution goalkeeper Djordje Petrovic chu pound maktaduai 12.5-in an la dawn a, a chet ṭhat dan a zirin £1.5m in an pek belh ang.

Kum 23 mi Serbia international Petrovic hi Stamford Bridge-ah Robert Sanchez nen khelhna hmun an inchuh ang. Season liam ta kha chuan Chelsea-in keeper-ah Kepa Arrizabalaga leh Edouard Mendy an nei a, Real Madrid leh Al Ahli te an zawm tak avangin tun season-ah keeper an thlak hlawk dawn.

Petrovic hian New England Revolution tan match 43 a khel a, Serbia tan vawi hnih a inlan tawh bawk. Chelsea goalkeeper Marcus Bettinelli a inhliam vangin Blues match hmasa pahnihah kum 20 mi Lucas Bergstrom chu bench-ah a ṭhu tawh.

Chelsea hian tun nipui bazarah player pariat lei nan £323mtd an hmang tawh a, Europe-a sum hmang tam ber an ni. Nipui bazara sum hmang hnem ber record an siam a, kum 2019-a Real Madrid-in £292mtd zet an hman chu an khum. Nikum nipuia Todd Boehly-a'n London club a lei hnuah Blues hian £850mtd chuang player lei nan an hmang tawh a ni.

Mauricio Pochettino hote hi August 25, Zirtawpni zan hian Premier League kai thar Luton Town nen an inkhel ang.