Palace-in Henderson an rim

Crystal Palace chuan Manchester United keeper Dean Henderson lakluh an duh a, mahse, Roy Hodgson-a team hian loan-in an la phawt dawn niin khawthlang media-te chuan an tarlang.

Kum 26 mi keeper hian Palace hi a zawm a nih chuan loan-in a pan phawt ang a, mahse, Eagles (Palace sawina) hian a ngheta lakluh theihna dan an nei tel thung ang.

Season hman zawh takah khan Henderson hian Nottingham Forest lamah loan-in hun a hmang a, mahse, Forest hian USA keeper Matt Turner chu Arsenal aṭangin an number 1 ni turin an la lut tawh.

Palace hian keeper Sam Johnstone leh Vicente Guaita an nei mek a, mahse, Spanish keeper Guaita hian season hmasa tawp lamah khan number 1 dinhmun chu English keeper Johnstone lakah chânin a lungawi lo.

Eagles boss Roy Hodgson chuan pre-season lai khan Guaita hian a lungawi loh avangin club tana inlan a duh tawh lo niin a sawi a, a club hlui Getafe lamah kir a duh.

Guaita hian kum 2018 khan Getafe aṭangin Palace hi free transfer-in a zawm a, hetihlaia la luttu pawh tuna coach tho Hodgson hi a ni - Palace-ah hian first choice a ni reng ṭhin.

Mahse, season hmasa chawhnu lama Palace-in Patrick Vieira bana Hodgson an kohkir khan, English boss hian Guaita aiah Johnstone a ring zui a, hei hi kum 36 ni ve tawh Guaita hian a hrethiam lo a ni.