Alaves lakah Sevilla an tlawm

Spanish La Liga club langsar Sevilla chuan Thawhṭanni zan khan Alaves chu 4-3 in an ngam lo a, tun season-a an league match hmasa pahnihah an tlawm - match hmasa zawkah Valencia chu 2-1 in an lo ngam lo tawh a ni.

La Liga kai thar Alaves hian minute sarihna lekah Luis Rioja hmangin goal hmahruai an khung a, mahse, Sevilla hian Abdel Abqar (own goal) leh Erik Lamela hmanga chhangletin, 2-1 a ni.

Sevilla ṭantuten hnehna an chan mai a rinawm a, mahse, an goal hnihna an khung aṭanga minute thumna lekah Ruben Duarte chuan khung ve lehin, Kike Garcia chuan goal hnih a khung bawk - Sevilla tan Rafa Mir chuan hun pek belhah khung ve leh mah se, hun tawp thlengin goal dang a lut tawh lo a, Alaves an chak.

Thawhṭanni zan inkhel dangah Rayo Vallecano chuan 2-0 in Granada an hneh bawk a, Álvaro García leh Pathé Ciss ten goal khat ve ve an khung - minute 86-naah Granada forward Antonio Puertas chu hnawhchhuah zui niin, an tan thawhleh ngaihna a awm tawh lo.