Liverpool-in Mac Allister hremna ngaihtuah ṭhat an duh
Alexis Mac Allister-a red card hmuh danah Liverpool lung a dam thei lo - Reds midfielder hi Bournemouth laka 3-1 a an chak ṭumin hnawhchhuah a ni a, hei hi Liverpool chuan ngaihtuah nawn turin thuneitu sang lamah an thlen dawn.
Inrinni zan khan Liverpool hian Anfield-ah Cherries hi an mikhual a, Mac Allister hian minute 58-naah Bournemouth attacking midfielder Ryan Christie chu a rap a, referee-in inngaihtuah buai loin red card a phawrh nghal.
Argentina international red card hmuh hi kaltlangpui a nih chuan match thum chhung inkhel thei loa hrem tur a ni a, hei hi Liverpool chuan a lutuk hretah ngaiin match khel tluan loa hrem a nihna chu a tawk tawhah an ngai.
Liverpool manager Jurgen Klopp chuan referee thutlukna chu hriatthiam har a tih thu leh, minute 90 player kim loa an khelh chu an tan hremna na tak a nih tawh thu a sawi.
England legend leh football pundit lar ni bawk Gary Lineker chuan referee thutlukna hi awmze nei lo a nih thu a lo sawi tawh a, Mac Allister hnawhchhuahna chu red card phawrhna tur niah a ngai lo.
Hetihlai hian Reds hi an vannei ve tho - Joe Rothwell chuan Dominik Szoboszlai laka a foul avangin penalty a chawi a, hei hi penalty pekna tur chuan a nem hretah tam takin an ngai.
Mahse, referee Thomas Bramall chuan thil thleng pahnihah hian video assistant referee (VAR) rawn ṭul ti lo ve ve chungin thutlukna a siam a, Liverpool chuan hremna tinep turin an thlen dawn.
Professional Game Match Officials Limited (PGMOL) chief refereeing officer Howard Webb chuan VAR lam duty te chuan a tlem thei ang ber game-a inrawlh an duh niin a sawi a, Webb hian season ṭantirh khan Wolverhampton Wanderers hnenah ngaihdam a lo dil tawh!
Wolves hi Manchester United nen an inkhelh ṭumin, United keeper Andre Onana chu Sasa Kalajdzic laka penalty chawi awm tak a nih laiin, referee-in penalty a pe lo a ni.
He thil thleng avang hian referee Simon Hooper, VAR Michael Salisbury leh assistant VAR Richard West te chu kar liam ta Premier League match-ah khan duty tir an ni lo.