Mason Greenwood Man United fa chuam, an tui thlar tak si chu...

Mi bik 'Greenwood'

Mason Greenwood hian buaina a tawh tak avangin Old Trafford a chhuahsan dawn a, hemi hma zawng hi chuan Man United tan chauh a khel. One club man ni tur hian rinawm ringawt a tawk lo a, thiam tel a ngai.

Man United legend David Beckham te meuh pawh khan senior team tana a khelh phak hmain Preston North End-ah loan hmanga an khelh avangin Real Madrid pan lo pawh ni se 'one club man' a ni thei lo.

Greenwood erawh United chhul chhuak dik tak a ni ringawt lo a, theihna a neih san avangin club-in loan hmanga a chhuah pawh an phal loh a ni. Midfielder-in bul a ṭan a, centre forward-ah a insawn chho a, a ke dinglam leh vei lam a hmang thiam ve ve.

United acacemy coach hlui Mark Senior chuan, "Mi ṭhenkhat chuan Robin van Persie thar an ti a, kei chuan amah anga khel hi ka hmu lo. A che rang em em a ni," tiin a sawi.

Manchester United player hlui Clayton Blackmore chuan, "A ke pahnih a hmang thiam a, penalty leh freekick ke pahniha pet ka hmuh hmasak ber a ni," tiin a fak viau bawk.

Man United manager hlui Ole Gunnar Solskjaer pawhin, "Tlarhmaah chuan a khel thei vek. Number 10, number 7, number 11 leh number 9 pawh ni se buaina a nei lo. A pianpuiah chuan ke vei lama pet a ni a, mahse a ke pahnih a pet thei. A ke ding lam leh vei lam hi a inang chiah loh pawhin 51:49 a ni hial ang," tiin mi bik a nihzia a sawi ve bawk.

Greenwood hi Man United manager ropui Sir Alex Ferguson pawhin a dahsang hle. Player naupang hmabak nei êng chungchang an zawh ṭumin Ferguson chuan, "Ka ngaihdanah chuan Mason Greenwood hi sang tak la thleng tur a ni. Striker ṭha neih tur ang a nei a, goal hmaah chi ai ve lo. Goal zawnah zel ball a pet a, a pet sang ve luah ngai lo. Phil Foden hi a ṭha bawk. Anni pahnih hi England-a rawlthar ṭha bik pahnih an ni," tiin a fak.

Tu nge Greenwood?

Mason Will John Greenwood hi October 1, 2001 khan Bradford, West Yorkshire-ah a piang. Kum ruk a nihin Manchester United a zawm a, theihna a neihsan em avangin 2017-18 season khan Under 16 tana a la khel thei nachungin Under 18 squad a zawm.

U18 Premier League North-ah match 21 aṭanga goal 17 khungin top scorer a ni. May 2018 khan Man United youth hian Netherlands-ah international youth football tournament 'ICGT Trophy'-ah an champion a, Greenwood hi best player atan an thlang.

Man United youth team tan Greenwood hian sulhnu ṭha tak a nei a, 2018–19 season-ah Jimmy Murphy Young Player of the Year atan thlan a ni. He chawimawina hlu tak hi Ryan Giggs, Paul Scholes, Phil Neville, Wes Brown leh Marcus Rashford te pawhin an lo dawng tawh a ni.

Greenwood te thlahtu aṭang chuan Jamaican an ni a, chutihrualin England-a piang a nih avangin England leh Jamaica tan a khel thei ve ve. Egnland tana khelh a thlang a; Under 15, Under 17, Under 18 leh Under 21 tana a khelh bakah senior team tan match khat a khel hman.

Zilh ngai Greenwood

Mason Greenwood hi player nungchang ṭha tih tur a ni bik lo a, tuna mualphona lian tham a tawh hma hian mualphona tenau a tawk tawh. August 25, 2020 khan England team tan koh a ni a, Iceland an hneh ṭumin minute 78-naah lutin ram tana a match hmasa ber a khel.

Covid-19 hunlai a nih avangin player-te an zalen lo a, quarantine dan an zawm vek a ṭul. Greenwood leh amah ang bawka talent nei ṭha Phil Foden ten an thlenna hotel-ah tho Icelandic nula an tawmpui avangin England team aṭangin thawn haw an ni.

Greenwood hi khelmual pawna a mualpho hnu hian Man United tan season ṭha tak hmang mah se September 2021-a World Cup qualifier khel tur zingah Gareth Southgate-a'n a ko lo.

Season li chauh maw!

Man United-in July 2018-a pre season tour an neih khan Mason Greenwood pawh a tel a, kum 17 a la tling lo. Club America nen friendly match an neih ṭumin minute 76-naah a lut a; October 2, 2018-ah professional contract a ziak. Jose Mourinho-a'n Greenwood hi chhawr hman lo mah se December thlaa Valencia nen UCL match an khelh ṭumin squad-ah a tel.

Ole Gunnar Solskjaer hnuaiah Greenwood hian club tan competitive match a khel ṭan a; March 6, 2019-a PSG 3-1 a an hneh ṭumin minute 87-naah a lut a, kum 17 leh ni 156 mi chauh a ni. Ni li hnuah Arsenal an hmachhawn ṭumin bench aṭangni a lut leh bawk. 2018–19 season hian Solskjaer hian league match thum a khel.

Season hnihnaah erawh season bul aṭangin a khel tawh a, season ṭantirhah kum 18 a la tling lo! 2019–20 season hian league match 31 khelin goal 10 a khung a, inelna hrang hrangah phei chuan match 49 khelin goal 17 a khung. Hmabak a nei êng hle.

Season thumna pawh a danglam tam lo. League match 31 tho a khel a, inelna hrang hrangah match 52 khelin goal 12 a khung. Season linaah pawh Greenwood-a'n bul a ṭan ṭha a, Robbie Folwer hnua teenager zinga Premier League match hmasa pathuma goal khung thei a ni hial. 2021–22 season hian league match 18 a khel hman a, goal nga a khung hman.

Mahse January 2022 aṭangin tuna a buaina hi a rawn irh chhuak ṭan a; January 31 aṭangin Man United-in an hrem. Hemi hnu hian vawi khat mah Man United tan a inlan leh ta lo a, a inlan leh tawh dawn lo bawk!

Greenwood-a thu chhuak

Social media-a an thil hmuh leh hriat aṭangin min buk dawn tih ka hrethiam a, ka thil tih aia uchuakin miten ka chet dan hi an ngaihtuah ang.

Inngaihzawnna emaw eng inzawmnaah emaw pawh tharum thawhna emaw, tihduhdahna emaw hi thil dik lo a ni tih hre tura zirtir ka ani a, min puhna te hi ka ti lo. February thla khan thubuai zawng zawng aṭanga chhuah zalen a ka ni.

Mahse, ka inngaihzawnnaah hian tihsual ka nei tih ka pawm tlat a, social media an thu thendarhah khan mawh ka phur a ni.

Professional footballer anga entawn tur ṭha tak siam turin ka mawhphurhna hriatthiam ka zir mek a, pa nihna mawhphurhna lian tak, chubakah kawppui ṭha tak nih tumin theihtawp ka chhuah mek a ni.

Thutlukna hi kei, Manchester United leh ka chhungte nen thawhhona ṭha tak nena siam a ni. Ka tana ṭha ber chu Old Trafford aṭanga hla taka football career chhunzawm hi a ni a, heta ka awm chuan club tibuaitu mai ka ni dawn. Kum sarih ka nih aṭanga ka zawm tirh aṭanga min thlawptu club chungah lawmthu ka sawi a ni. Ka taksa peng pakhat a awm reng dawn a, chu chu United a ni.

Ka chhungte leh ka hmangaih zawng zawngte chungah lawmthu ka sawi tak meuh meuh a, tunah chuan ka chhehvela mite rinna an lantir chu ka rul let leh thei ta a ni. Footballer ṭha zawk nih ka tum a, a pawimawh ber chu pa ṭha, mi ṭha zawk nih ka tum a, khelmual chhung leh pawnah pawh ka talent te hi a ṭha zawnga hman ka tum a ni.

Greenwood-a pawi khawih chu

Greenwood chu January 30, 2022-ah a bialnu sawisa a puh a ni a, social media lamah thlalak leh video a darh chiam. Thlalak darh hi hmeichhe hliam tuar thlalak a ni a, video-ah hian a ṭawng ri a hriat theih bakah 'Mason' hming lam rik a ni bawk.

January 30 tlai lamah chuan Greater Manchester Police-in Greenwood hi pawngsual leh hmeichhe sawisaa rinhlelh vangin man a ni. February 1-ah phei chuan an man chhanah hian thah tuma vauna a tel tawh. Nike chuan Greenwood nena an contract an titawp nghal a, EA Sports lamin FIFA Games aṭangin Greenwood hi an paih bawk.

October 15, 2022 khan Greenwood hi a puhtu biak avanga a bail dan bawhchhia nia sawiin man a ni. Hemi ni vek hian 22 October 2021-a thil thleng (pawngsual tumna) avangin thubuai siamsak a ni a, December 2021-a thil thleng (taksa khawih nat) thubuai siamsak a ni bawk.

November 2018 aṭanga khan invauna ṭawngkam a hman ṭan avangin thubuai an siamsak. October 17, 2022 aṭanga November 21, 2022 thleng hren tura tih a ni a, mahse October 19 khan Minshull Street Crown Court-a private hearing neih a nih hnuah bail phalsak a ni a, thuhretu leh amah hektu te biak phalsak a nih loh bakah a chenna Bowdon-a chhuahsan loh tura tih a ni bawk.

February 2, 2023 khan Crown Prosecution Service chuan Greenwood-a thubuai zawng zawng chu a hlihsak vek a, hei hi a chhan chu thuhretu pawimawhte an inhnuhdawh vang a ni.

Lak lêt duh mah se an thlauh thla ta zawk

Mason Greenwood theihna sanzia hrechiang bertu chu Manchester United an ni a, club thuneituten Greenwood hi a hremna an hlih takah chuan laklet an duh. Chutihrualin hun rei tak training tawh lo a nih avangin Erik ten Hag-a'n tlarhma tih chak nan mamawh viau mah se a hma berah pawh thla hnih thum hnua rawn let thei chauh tura ngaih ni.

Man United-in season ṭan hmain Greenwood chungchang an puan tur thu an sawi. United chief executive Richard Arnold chuan August thla tir khan club hotu dang nen inhmukhawmin Greenwood chungchang an rel a, tum chu English forward laklet hi a ni.

Mahse sawiseltu an tam tak avangin United thuneitute hian thutlukna siam sa an zuk a, thutlukna an la siam loh thu an puang thung. Anihna takah chuan Greenwood hi amah hektu Harriet Robson hian an inrem leh tawh a; July 11, 23-ah naute an nei zawk. April 2022 daih tawh khan Police hnenah thubuai titawpsak turin a ngen bawk.

Greenwood hi a bialnu Harriet Robson-i'n a ngaidam thlap a, fa a neihsak leh tawh zawk lai hian Man United ṭantu hmeichhe lamin an pawm thei lo.

Wolves nena Man United an hmachhawn ṭumin hmeichhe intel khawm hian hmeichhe kutthlaktu chungah hian zahngaihna lantir lo turin club an ngen.

Man United pawh hian thutlukna an siam hma hian club hmeichhe team player-te ngaihdan an lak tur thu an sawi bawk. Television presenter Rachel Riley pawhin United-in Greenwood an chelh chuan Man United a ṭan tawh loh tur thu a sawi.

Politician an inrawlh a, MPL ṭahnem takin club-in Greenwood laklet an tum chu an sawisel bawk. A tawpah chuan Man United-in player pakhat aiin club hmalam hun a ngai pawimawh ta zawk a, hreh tak chungin Mason Greenwood an thlauh thla ta a ni.

Chutihrualin United chief executive Richard Arnold chuan Greenwood hi zin kawng thar a zawhna kawnga an puih zel tur thu a sawi thung. Man United hian Greenwood chungchang hi thla ruk chhung an zirchiang a, an thutlukna erawh an pawm vek lo.

Lawm lo zingah club legend Gary Neville a tel a, Man United captain hlui chuan Man United chu hruaitu ṭha nei loah a puh a ni.