Hliam vanga chawl rih tur Mount

Manchester United midfielder Mason Mount chuan hliam vangin Premier League match hnih a khel thei dawn lo. English midfielder Mount hi Tottenham Hospur laka 2-0 a an tlawm ṭumin hliam tenau a nei a ni.

Erik Ten Hag-a hote hian August 26, Inrinni zan dar 7:30 hian Nottingham an hmachhawn dawn a; September 3, Pathiannia Arsenal hmachhawn turin Emirates Stadium an tlawh lehnghal dawn. Mount hi match pawimawh pahnihah hian a khel thei lo ang.

Man United hian kumin June thla khan Chelsea aṭangin pound maktaduai 55-in Mount hi an la lut. England international Mount hi a khelh tawh chinah beisei a pha lo a, friendly match chhiar tel pawhin club thar tan goal a la khung lo.

Wolves laka United 1-0 a an chak ṭumin minute 68-naah Christian Eriksen-a'n a thlak a, Spurs laka an tlawm ṭumin minute nga la awmin Facundo Pellistri-a'n a thlak leh bawk.

September thlaa international break-ah England-in Ukraine nen Euro 2024 qualifier an khel dawn a, ram tan pawh hian Mount dinhmun hi a chiang lo.