Guardiola an zai dawn

Manchester City manager Pep Guardiola chu chawpchilh takin a hnungzang zai a ni dawn. Spanish manager hian Premier League match pahnihah Citzens a enkawl thei dawn ta lo a ni.

Man City thuchhuah dan chuan, kum 52 mi Guardiola hi chawpchilh taka zai a ngai a, zaipui ni loin zai tenau a ni thung ang. Beisei ang chuan international break hman zawh hunah City an enkawl leh hman tawh ang.

Tun kartawp Pathianni zan hian Sheffield United khelmualah Man City an lenglut dawn. September 2, Inrinni zan hian Etihad Stadium-ah Fulham an mikhual bawk ang, heng match pahnihah hian Pep a tel dawn lo tihna a ni.

Guardiola awm loh lai hian assistant manager Juanma Lillo chuan a hna a lo thawk dawn, team training kaihruaiin khelmual sir aṭangin a naute inkhel pawh a kaihruai rih ang.

Man City chuan thuchhuah siamin, "Tun hnai khan kan manager Pep Guardiola chu a hnungzang a na, Barcelona khawpuiah Dr Mireia Illueca-a'n zaiin a inenkawl nghal ang. A awm loh chhungin assistant manager Juanma Lillo chuan a hna a lo thawhsak dawn.

"Beisei ang chuan international break zawh hunah a lo kir leh ang. Manchester City chuan Pep-a hi dam leh thuai turin duhsakna kan hlan. Manchester khawpuiah hlim taka kan inhmuh leh thuai kan beisei," an ti.

Kum 52 mi Guardiola hian season hmasa khan Man City hi Premier League, FA Cup leh Champions League nomawi a chawipui a, an club chanchinah season an hman ropui ber ṭum a ni hial.

Tun season pawh bul an ṭan fuh. UEFA Super Cup an la tawh - Premier League match hnih an khelh tawhah an la chak ve ve. Man City bakah Brighton leh Arsenal te chu chak ve ve thei an ni.