Asian Champions League khel tur Ronaldo

UEFA Champions League nomawi panga zet chawi tawhtu Cristiano Ronaldo chuan Asia khawmualpuia club inelna sang ber AFC Champions League a khel dawn a, playoff round-ah Al Nassr chu hnehna a chanpui.

Al Nassr hian season hman zawh takah khan Saudi Pro League-ah pahnihna dinhmun an luah a, playoff an khelh a ṭul phah - playoff round-ah hian Shabab Al Ahli chu 4-2 in an hneh a, group stage an inpetkai.

Saudi club tan Anderson Talisca chuan goal hnih khungin, Sultan Al Ghannam leh Marcelo Brozovic ten goal khat ve ve an khung bawk a, Shabab tana Yahya Al Ghassani goal hnih khungin awmzia a nei phak lo.

First half-ah Ronaldo chuan penalty hmuh a inbeisei a, mahse, vawi hnih ngawt a beisei penalty a hmu lo - hei vang hian thinrim takin referee a ṭawngkhum a, hremna erawh pek a ni ta chuang lo a ni.

Inkhel boruak

KSU Stadium, Riyadh khawpuia inkhelah Al Nassr-in Talisca hmangin minute 11-na lekah goal hmahruai an khung zuk a, mahse, UAE international Al-Ghassani chuan goal hnih hmanga chhanglet nghalin, 2-1 in hma an hruai daih.

Tlarhmaa Ronaldo, Sadio Mane leh Talisc tlar theitu Al Nassr-in a chhanletna an nei lo reng a, an tlawm mai dawn nia ngaihna a lian hman. Mahse, hun tawp nan minute hnih chiah a awm tawh tihah star langsar karah Al Ghannam chuan si phurh sutna goal a khung.

Al Nassr an phur sawt a, hun pek belhah goal hnih an khung zui - Talisca chuan 90+5-ah khung belhin, minute hnih hnu lawkah Brozovic chuan a belhchhah ve leh bawk.

Saudi club tan Ronaldo leh Mane ten goal an khung lo a, Brozovic goal khung erawh Portuguese forward Ronaldo siamsak a ni. Al Nassr an chak a, AFC Champions League khel turin an inpetkai.

India-ah Ronaldo?

Ronaldo leh a ṭhianten AFC Champions League an khel dawn a, India rama an kalna chance a awm. Asia khawmualpuia football inelna sang berah hian team 40 an tel dawn a, team 40 hi west region leh east region-ah team 20 ve ve awmin ṭhen leh an ni.

India chu west region-ah hian Saudi Arabia nen an awm ho a, India aiawha khel tur Mumbai City chu pot 3-ah awmin, Ronaldo khelhna Al Nassr hi pot 4-ah an awm thung. Chumi awmzia chu Al Nassr leh Lallianzuala Chhangte khelhna Mumbai hi group khata awmna chance a awm.

Pot 1-ah Saudi club Al Hilal leh Al Ittihad an awm bawk - Al Hilal hi Neymar, Aleksandar Mitrovic, Ruben Neves leh Kalidou Koulibaly te ho awmna a ni a, Ittihad hian Karim Benzema, Fabinho, N'Golo Kanté leh Jota te ho an nei bawk.

Saudi club hoin player an neih ṭhat avangin AFC Champions League-in ngaihven a hlawh lehzual a, Lianzuala leh Lalengmawia Ralte (Apuia) te hoin football khawvela player langsar ber ber an hmachhawn lo ang, tih a sawi theih ta lo.

An bazar zel

Saudi lam sum neih zarah AFC Champions League boruak a 'hot' thar a, footballer tam takin group khata Saudi club langsar ho awmpui an châk - heti chung hian an la duhtawk mai lo.

Al Nassr chuan Portugal midfielder Otavio chu Porto aṭangin an la lut leh ta a, a man zat hi tarlan ni chiah lo mah se khawthlang media-te chuan euro maktaduai 60 vel niin an tarlang.

Kum 28 mi Otavio hian kum 2014 khan Brazilian club Internacional aṭangin Porto hi a zawm a, match 282 a khelhsakah goal 31 khungin, Primeira Liga-ah vawi thum a champion pui hman.

Season hmasa Primeira Liga Player of the Season ni thei Otavio hian kum khatah euro maktaduai 13 vel a hlawh dawn niin an sawi a, Manchester City defender Aymeric Laporte chuan Al Nassr hi a zawm dawn nia sawi a ni bawk.