Mac Allister hremna an hlip

Liverpool ṭantuten rimawi hriat tur an nei ve leh ta a, Bournemouth nen an inkhelh ṭuma hnawhchhuah Alexis Mac Allister chuan hremna a tuar tlang dawn lo.

Argentine midfielder hian Cherries nen an inkhelh ṭumin Ryan Christie chu a rap a, minute 58-naa thil thleng avang hian hnawhchhuah a ni. Dan ang tak chuan match thum dang inkhel thei lo zui tur a ni.

Mahse, Liverpool chuan an player hremna hi a na lutukah an ngai a, coach Jurgen Klopp chuan, "Thutlukna na tak a ni," tiin referee thutlukna chu a lo sawisel tawh a, a hnuah club chuan ngaihtuah ṭhat turin Football Association hnenah an thlen.

English FA Independent Regulatory Commission chuan Liverpool dilna hi ngaihtuah zuiin, hremna hi kaltlangpui lo turin thutlukna an siam a, "Independent Regulatory Commission chuan match thum khel thei lo tura hrem Alexis Mac Allister hremna chu a dik tawk loa sawi chungchang a ngaihtuah a, match thum hrem a nihna chu a titawp a ni," an ti.

Mac Allister khan Christie a rap fuh ngei niin lang mah se, tihluih a ni loin a lang a, England legend leh football pundit lar ni bawk Gary Lineker pawhin vantlang hriatah Reds midfielder hrem a nihna chu na takin a lo sawisel tawh.

Reds hian Pathianni zan dar 9:00-ah Newcastle United an lenchilh dawn a, season thara Champions League khel tur Magpies hi team ṭha tak an nih avangin Liverpool tan a awlsam dawn lo.

Hei vang hian duhthusama midfield la thuam ṭha lo Liverpool tan Mac Allister an chhawr lehnghal thei tur hi chanchin lawmawm a ni. Kum 24 mi Mac Allister hian pound maktaduai 35-in Liverpool hi Brighton & Hove Albion aṭangin a zawm.

Ani bakah hian RB Leipzig aṭangin Dominik Szoboszlai chu £60mtd-in an la a, an rim lai Moisés Caicedo leh Roméo Lavia ten Liverpool aia Chelsea zawm an thlan avangin VfB Stuttgart midfielder Wataru Endo chu £16.2mtd-in an la bawk.

Mahse, Reds hian nipuiah midfielder an chân nual a, Naby Keita, James Milner leh Alex Oxlade-Chamberlain chân tur chuan inring sa mah se, rin loh takin Fabinho leh captain Jordan Henderson an chhuak leh bawk a, midfielder mamawhna a sang hle.

Hei vang hian Liverpool hian transfer bazar-ah mit an la len reng nia sawi a ni a, Bayern Munich midfielder Ryan Gravenberch leh Manchester City midfielder Kalvin Phillips te hming lam rik a ni.

Hetihrual hian Brazilian media-te chuan Reds-in euro maktaduai 30-a Fluminense midfielder André lei an dilna chu hnawlsak an ni, tiin an tarlang a, transfer bazar-ah Reds chanchin a la reh mai dawn lo, niin a lang.