City player thar tur Doku

Premier League club Manchester City chuan Rennes aṭangin Jeremy Doku an la lut dawn. Belgium winger lakluh nana sum chevel hi pound maktaduai 55.4 a tling dawn hial niin khawthlang chanchinbu mite chuan an tarlang.

Kum 21 mi Doku hian Ligue 1 club Rennes tan inelna hrang hrangah match 92 aṭangin goal 12 a khungsak a, a kum a la naupangin hmabak nei êng taka ngaih a ni - Pep Guardiola hnuaiah thil tam tak a zir belh thei dawn.

West Ham, Tottenham leh Chelsea te pawhin Doku hi an hel a, mahse English champion hian an chang thei ta zawk. Tun nipui chhungin Citizens hian midfielder Mateo Kovacic leh defender Josko Gvardiol te an lo la tawh bawk a ni.

Player thar pathum an neih lai hian Riyad Mahrez leh captain Ilkay Gundogan te chu Saudi Pro League club Al-Ahli leh Barcelona lamah an chhuak thung a, player an insiksawi mek a ni.

Spain defender Aymeric Laporte leh Portuguese full-back Joao Cancelo te pawh an chhuak dawn tih a chiang tawh. Anni pahnih hi Man City tana player pawimawh leh ṭangkai tak an ni ṭhin, mahse season hmasa aṭang khan Pep-a'n a chhawr tam tawh lo thung.