Cricket Festival

Kan hma lawk Khuangchawi thla lamah India-in ICC Cricket World Cup a thlen dawn avangin inpuahchahna khelmual chhung leh pawn lamah vung taka kalpui mek a ni. Chumi hlimthla atan chuan tun thla tawp leh Mimkut thla chawhma lam hian Pakistan leh Sri Lanka ten Asia Cup an inthlen ṭawm dawn bawk a nih kha.

Luhaina ṭha lam?

Ajit Agarkar-a kaihhruaina hnuaia Selection Committee chuan, Asia Cup atana India aiawhtur player 17 an thlang chhuak. Chung zingah chuan hliam dam kawr hlim; KL Rahul, Shreyas Iyer leh Jasprit Bumrah te an tel. Ball ṭhuai thiam ṭha mi R. Ashwin leh Y. Chahal a te koh tel an ni lo erawhin sawi zui a hlawh.

Tun hnaia rawlthar chhuak thar ṭha Yashasvi Jaiswal a vanduai a, thlan tel zinga tel Tilak Varma erawh he hun remchang hi World Cup team atana a dinhmun sawhngheh nan a hun ṭha a ni thung ang. Chutihrual chuan ICC danah World Cup-ah chuan player 15 chauh squad-ah an awm theih avangin, hmun inchuhna boruak hi a 'hot' telh telh dawn tih a chiang.

Indo - Pak

India sorkar laipui lamin, ruahman lawk anga group stage thleng tur Pakistan lamah India team zin a phal lo. Hemi avang hian International Cricket Council (ICC), Asian Cricket Council (ACC) leh Pakistan Cricket Board (PCB) lam te hun rei tak indawrna an neih hnuah, India awmna group chu Sri Lanka lama khel vek turin a ruahman ta.

Tournament ṭan hma ringawt pawhin boruak a ṭang nghal. Indian Cricket team hian Pakistan leilung an rah tawp ber chu 2008 daih tawh kha a ni a, tun ṭuma head coach Rahul Dravid pawh hi player a la ni. Pakistan-in Asia Cup an thleng a, India hian final lut mah se Sri Lanka an hneh ta lo.

Ṭhangkhat lian zet hnuah pawh boruak hi a la danglam thei tak tak lo. September 2, Inrinni a rawn inherchhuah meuh chuan, Super Saturday blockbuster kan beisei leh ngei dawn a ang. Pallekele International Cricket Stadium, Sri Lanka-ah India leh Pakistan te an inkhel dawn a, cricket ngainatute tan hmaih phal chi a ni lo!

India squad: Rohit Sharma (Captain), Shubman Gill, Virat Kohli, Shreyas Iyer, Suryakumar Yadav, Tilak Varma, KL Rahul, Ishan Kishan, Hardik Pandya (VC), Ravindra Jadeja, Shardul Thakur, Axar Patel, Kuldeep Yadav, Jasprit Bumrah, Mohd. Shami, Mohd. Siraj, Prasidh Krishna

Stand-by: Sanju Samson