Champions League playoff; Rangers leh PSV an inhnehtawk

European football-a club inelna sang ber Champions League-ah club 32 an inel dawn a, mahni ram league aṭanga tling chiang sa team 26 an awm - a bak hmun ruk paruk erawh qualifier kaltlanga hnawhkhah tur a ni.

Champions League qualifier hmawr bawk a hnai a, playoff round an khel tawh - Scottish club Rangers chuan Thawhlehni zan khan playoff-ah PSV Eindhoven an mikhual a, 2-2 in an inhnehtawk.

Rangers hian Abdallah Sima leh Rabbi Matondo hmangin vawi hnih ngawt hma an hruai a, mahse, Dutch club-in Ibrahim Sangare leh Luuk de Jong hmanga vawi hnih si phurh sutin, 2-2 in inkhel a tawp a, Champions League khel tur zawk a la sawi theih loh - second leg an la bak.

Thawhlehni zana playoff match dangah FC Copenhagen chuan 1-0 in Rakow Czestochowa an hneh a, Royal Antwerp chuan 1-0 in AEK Athens an hneh bawk - nizanah match thum dang khelh a ni a, result kan hre hman lo.

Rangers beiseina

Scottish Premiership-ah Celtic tluk loin champion nomawi chawi lo mah se Rangers-in third qualifying round aṭanga inelna hmachhawn ṭanin, an zinkawngah Swiss Super League club Servette FC chu an hneh.

Rangers hian season zawna Champions League group stage khelh an beisei a, Ibrox stadium-a inkhela goal khung hmasa zawk pawh an ni. Brighton & Hove Albion aṭanga loan-a an hawh Abdallah Sima chuan minute 45-naah goal hmahruai hi a khung.

Goal dang lut loin chawlhlawk hman zui a ni a, Morocco winger Ismael Saibari thawhrah sengin Sangare chuan PSV tan si phurh a sut. Dutch team-in inkhel an thunun zawk bawk avangin an chak zawk mai a rinawm.

Mahse, Rangers bawkin goal an khung nawn. Kum 22 mi winger Matondo chuan Cyriel Dessers-a siamsak ṭha tak chu goal-ah a chantir a, 2-1 in Scottish club-in hma an hruai.

Mahse maw...

Mahni khelmuala khel an ni bawk a, Rangers-in khel ṭha lo zawk mah se chak mai beiseina an nei. Mahse, European football-a tawnhriat nei ṭha PSV-in chuti maia tlawm an tum bik lo. Minute 80-naah De Jong chuan si phurh a sut leh a, hun tawp thleng goal dang a lut tawh lo. August 30-ah second leg hi PSV khelmuala khelh leh tur a ni a, Dutch team hi an dinhmun a ṭha zawk, tiin a sawi theih.

PSV tan De Jong a la rintlak reng a, kum 32 mi striker hi season hmasa ṭan dawn khan Dutch team-ah hian a kir. A hunlaia Eredivisie club De Graafschap-ah bul ṭanin, FC Twente, Borussia M'Gladbach leh Newcastle-ah te khelin hun a hmang. De Jong hian 2013-14 season chu Gladbach leh Magpies (loan) ah khelin match 26-ah goal a khung miah lo.

Netherlands-ah kira PSV a zawm hnuah match 204 khelin goal 112 ngawt a khungsak a, mahse, ram pawna hlawhtlinna beiseiin kum 2019 khan Sevilla a pan a, beisei a phak chuang lo - match 94-ah goal 19 chiah a khung.

Barcelona-ah 2021-22 season kha loan-in a khel a, match 29-ah goal sarih a khung. Season hmasa ṭan dawn khan PSV-ah bawk kirin, match 39-ah goal 18 a khung a, tun season-ah pawh goal a la khung thei reng tih a pholang nawn.

Inkhel dang

Kum 1958 khan Royal Antwerp chuan an club chanchina a vawi khat nan European Cup an khel a, hemi hnuah hian European football-a club inelna sang ber an khel leh tawh lo - hetihlai hian group stage anga inelna hi kalpui a la ni lo a, first round-ah Real Madrid chuan 8-1 in an sawp.

Belgian champion hian kum 1958 hnua a vawi khat nan Champions League khelh ngei an duh a, kawng dik an zawh - playoff first leg-ah AEK Athens chu 1-0 in an hneh.

Belgian club tan Tottenham Hotspur striker hlui Vincent Janssen chuan inkhela goal awmchhun a khung a, minute 50-naah Jelle Bataille hnawhchhuah ni mah se an ṭang tluan.

Hetihlai hian FC Copenhagen chuan 1-0 in Rakow Czestochowa an hneh bawk a, Danish club tan Bogdan Racovitan chuan an lamah a tilut - hun tawp thlenga goal dang lut loin Copenhagen an chak.