West Ham-ah Arsenal defender hlui

West Ham United chuan Arsenal defender hlui Konstantinos Mavropanos an la lut a, season nga daih contarct ziahpuiin a man zat erawh tarlan a ni lo thung.

Kum 25 mi Mavropanos hian 2018 January thla khan Gunners a zawm a, mahse Premier League match sarih chauh a khel. German club Stuttgart a pan a, tunah chuan EPL lamah bawk a lo kir leh ta.

Greece defender Mavropanos chuan, "Chona thar ka hmachhawn leh dawn ta a, ka club thar tan hian theihtawp ka chhuah ang. Premier League ka khel leh thei turte hian min tiphur hle a ni," tiin a sawi.

Tun nipui bazar chhungin Hammers hian an captain Declan Rice chu Arsenal lakah an chân. Rice chân mah se midfielder pahnih James Ward-Prowse leh Edson Alvarez te an lei a, tunah defender thar Mavropanos an neih belh.

Hammers manager David Moyes-a'n Manchester United aṭangin Harry Maguire lak a tum a, mahse an la ta lo. England defender an lak theih loh avangin Mavropanos hian hmun pawimawh a chan a rinawm.