Bayern keeper thar tur Daniel Peretz

Bayern Munich-in goalkeeper buaina chinfel nan Daniel Peretz chu Maccabi Tel Aviv aṭangin an la lut dawn. Peretz hi rinrawla hman nghal tur a ni lo a, Manuel Neuer leh Sven Ulreich te thachhangdawltu tur chauh a ni.

Bayern leh Tel Aviv te hi Peretz chungchangah euro maktaduai ngain an inrem a, a chet ṭhat dan a zira pek belh tur a awm. Kum 23 mi Peretz hian kum nga daih contract a ziak ang a, tunkar tawpah medical a nei ang.

Israel club Maccabi Tel Aviv hian zanin dar 10:30 hian Europa Conference League playoff-ah Slovenia club Celje an hmachhawn dawn a, Peretz hian a la khelhsak phawt dawn.

Peretz hi Maccabi Tel Aviv aṭanga inzir chhuak a ni a, Israeli Premier League-ah season hnuhnung pahnihah match 35 a khel tling ve ve a ni.

Bayern hian Peretz aia tawnhriat nei ṭha zawk Alexander Nubel chu loan hmangin an chhuahtir a, Yann Sommer pawh Inter Milan-ah an hralh bawk. Club thuneituen Nubel leh Sommer a chhuahtir chhan hi rinrawl nih an duh vang a ni a, Bayern-ah Neuer a awm avangin an duh ang hi tihsak theih a ni lo.

Tun dinhmunah erawh Neuer hi a la dam chian loh avangin a la inkhel thei lo a, kum 35 mi Sven Ulreich-a'n a hmun ruak a luah khat rih. Ulreich erawhin Neuer thachhang dawltu nih a pawi ti lo a, Bundesliga nomawi pawh vawi sarih zet a chawi tawh a ni.