Indian Army leh Highlander intawng dawn

Durand Cup quarterfinal chu vawiinah khelh ṭan a ni dawn a, Indira Gandhi Athletic Stadium, Guwahati-ah Indian Army Red leh NorthEast United an intawng dawn - a hmuhnawm ang.

Mizo player tamna ṭhin NorthEast United-ah Rochharzela leh Fredy Chawngthansanga te chu Mizo awm an ni a, Aizawl FC forward hlui Chhara hian kum 2020 khan Guwahati club hi zawm tawhin, Fredy hi tun nipui transfer-a an lakluh a ni thung.

Highlander-ah hian season hmasa khan R. Laldanmawia, Joe Zoherliana leh Emanuel Lalchhanchhuaha te an awm a, mahse, player pathum hi tun season-ah erawh NorthEast club-ah an awm tawh lo.

Durand Cup 2023 khelh mekah NorthEast United hian match thumah point sarih hmuin, quarterfinal an lut a, Indian Army Red tan anni hmachhawn hi thil awlsam a ni dawn lo - chutihrual chuan sipai club hian ISL club petchhuah hi an châk dawn.

Indian Armed Force team pathum tel zinga quarterfinal lut awmchhun Army Red hian group F hmahruaitu ni chungin knockout round hi an lut a, Rajasthan United, Bodoland leh ISL club Odisha te nena awm ho an nih avangin an record hi a chhe lo - match thumah vawi hnih chakin, vawi khat draw an nei.

Army Red-ah hian Mizo player pahnih awmin, centre back Zothanpuia leh midfielder Francis Zonuntluanga te an ni a, semifinal-ah sipai club hruai thlen ngei an tum ang.

August 22, Thawhlehni zan khan Durand Cup group stage match khelh zawh a ni a, match hnuhnung berah Bengaluru chuan 2-0 in Gokulam Kerala an hneh - inkhel result erawhin awmzia a nei phak tawh lo thung.

Bangalore club tan hian Robin Yadav leh Lalpekhlua ten goal khat ve ve an khung a, India Under-17 international Peka'n a team a chakpui a, knockout round lut erawh an inkhelh hmain a chiang tawh a, result-in awmzia a nei lo.