Lionel Messi hoin final an lut leh ta
Goal hnih an phurh hmasak hnuah Inter Miami an tho chhuak a, player ṭha Lionel Messi an neih chinah danglamna a thleng chhunzawm zel - tunah chuan US Open Cup final an lut leh ta a ni.
Nimin zing US Open Cup semifinal inkhelah Messi-a'n goal khung lo mah se Leonardo Campana tan vawi hnih a siamsak a, 3-3 a an inhnehtawk hnuah penalty shootout hmangin Miami hi 5-4 in an vannei ta zawk.
September 27, Nilainiah Inter Miami hian Houston Dynamo nen nomawi an inchuh ang. Semifinal inkhel dangah Houston Dynamo hian Real Salt Lake chu extra time an khelhpui hnuah 3-1 in an lo hneh ve thung a ni.
An tho leh
TQL Stadium-a inkhelah mualneitu FC Cincinnati an che fuh hmasa zawk, midfielder Luciano Acosta leh striker Brandon Vazquez te goal hmangin hma an hruai a, minute 53-naah 2-0 a an chungnun avangin an dinhmun a ṭha hman hle.
Mahse, minute 68-naah Inter Miami lamin mual sirah freekick an hmu - Messi chuan Campana tauh luh turin a siamsak. Hun tawp hma chiahin Argentina captain hian Campana tan bawk ball ṭha bik a pe leh a, chiang zetin a lo tauh lut.
Hamrik hnuhnung a ri zui a, hun pangngaiah 2-2 in an inhnehtawk. Extra time khelh zui niin mikhual lamin Josef Martínez-a goal hmangin hma an hruai let daih a, mahse Cincinnati lamin Yuya Kubo hmangin an sut ve leh a ni.
Penalty shootout-ah Inter Miami tan Messi, Facundos Farias, David Ruiz, Maryinez leh Benjamin Cremaschi ten an khung vek laiin Cincinnati tana pet hnuhnung bertu Nick Hagglund chuan a hlah thung.
Danglamna
Major League Soccer (MLS) an chawlh lailawk hma khan Cincinnati hian match 24 aṭanga point 51 hmuin Eastern Conference hmahruaitu an ni a, match 22 aṭanga point 18 neitu Inter Miami erawh a hniam ber an ni thung.
Messi an neih chinah MLS an la khel ṭan leh lo - League Cup khelin David Beckham-a club hi an champion a, an champion avang hian US Open Cup semifinal an luh theih phah, tunah chuan final an thleng leh ta a ni.
Barcelona player hlui pathum Messi, Sergio Busquets leh Jordi Alba an neih hnua Inter Miami hmasawn dan hi a kang chak hle a, tunah chuan MLS khel pawh ni se table hmahruaitu pawh an huphurh tawh lo ang.
A zawna match riat chhung an chak tak avangin Inter Miami player-te an inringtawk tak zet tawh a, goal an phurh hmasak pawhin hun tawp hma chuan an beidawng lo, a tawpah chuan a chungnung zawk an ni leh ta a ni.
Martino a hlim
Miami coach Tata Martino chuan, "Fist half-ah khan goal kan phur a, a nihna tak sawi chuan goal kan khung ve lo kha a mak zawk hial. Kan khingpuite kha team ṭha leh inveng thiam tak an nih avang erawh chuan thil kha a awlsam bik lo.
"A pawimawh lai tak chu goal hnih kan chhuah hnua kan hnual mai lo kha a ni. Second half-ah kha chuan inkhel kan thunun lehzual a, kan phu ang ngeiin goal kan khung, a tawpa kan chak dan erawh vanneih vang a ni," tiin a sawi.
Martino hian Messi an neih hnua an danglam nasat thu a sawi bawk. Barcelona captain hlui hian Leagues Cup-a an champion theih nan goal 10 a khung a, tun inelna neih lai US Open Cup-ah goal khung chhunzawm lo mah se a khelh danah an coach a lungawi hle.
August 27, Pathianni zing dar 5:00 hian Inter Miami chuan MLS khel turin New York Red Bulls an lenchilh dawn - Messi te ṭhianho pathum tan MSL match hmasa ber a ni dawn a, a boruak pawh a danglam deuhin a rinawm.