Neymar vs LZ Chhangte - A tak ngei a ni e!

Football khawvela Neymar hming ropuizia inhrilh nawn a ngai lo - khawvela footballer man to ber hian hmanni lawk khan Asia lam hawiin a puanthuah a tel a, Saudi Pro League club Al Hilal a zawm.

Thla khat em pawh a la liam lo a, chu footballer ropui chuan Mizo footballer Lallianzuala Chhangte a hmachhawn dawn a, khelmualah Mizo footballer-ten European football-a hming langsar ber ber an inelpui dawn.

Nimin khan AFC Champions League draw neih a ni a, group D-ah Mumbai City hian Neymar-a khelhna Al Hilal an awmpui dawn - chumi awmzia chu inkhel turin Neymar pawh India-ah a lokal dawn tihna a ni a, football fans zingah tu nge maw lawm lo ang le?

Season hmasa ISL league winner nih vanga Champions League khel tur Mumbai hi group D-ah awmin, Al Hilal bakah Iran club ṭha Nassaji Mazandaran FC leh Uzbekistan club ṭha Navbahor Namangan te nen an awm ho ang - September 18-ah inelna neih ṭan a ni ang.

Mumbai an phur

Nimina Champions League draw neih a nih lai hian, Mumbai player-te chu Durand Cup khela an awmna Kolkata khawpuia an thlenna hotel-ah an awm khawm a, Champions League draw neih a nih lai hi a huhoin an en.

Mumbai hian Al Hilal nen group khatah an awm dawn tih an hriat chiah chuan lawm avangin an au a, Indian club ṭha hian Neymar-a awmna club an hmachhawn tur hi an lawm takzet - an huphurh loh vang lam erawh a ni lo.

AIFF player of the year ni lai Lallianzuala Chhangte chuan, "Kan phur tawh a, a châkawm khawp mai. Chutihrual chuan nikum aiin kan elpui turte an ṭha dawn tihna a ni a, a harsa ang," tiin Vanglaini a hrilh a, an hmabak a khauh thu a sawi.

Mumbai City hian season hmasa khan Champions League hi an lo khel tawh. Group B-ah awmin, point sarih an hmu a, pahnihna an ni - an group-ah hian Saudi club tho Al-Shabab chu pakhatna niin, point 16 an hmu a, an phak lo hle.

Beiseina nen

Al Hilal hian Neymar bakah Chelsea aṭanga an lakluh Kalidou Koulibaly, Portuguese midfielder Ruben Neves, Fulham aṭanga an lakluh thar Aleksandar Mitrović, Porto forward hlui Moussa Marega, Lazio-a hming chher tak Sergej Milinković-Savić leh Sevilla keeper hlui Yassine Bounou te an kawl.

Mumbai tan chuan anni ho nena khelmual khata inel ringawt pawh hi thil ropui leh chhinchhiahtlak a tling a, Indian football tan pawha hriatreng tlak a ni dawn.

Mahse, Mizo forward ṭha mi chuan ngaihsan zawngte khelhpui maia tawp an tum lo tih a sawi. Lianzuala chuan, "Al Hilal chu sawi loha leng an ni a, club dang pahnih pawh an ṭha. Season hmasa aiin a harsa dawn a ni.

"Mahse, kan lo ngaihsan êm êm ṭhinte hmuh theihna leh khelhpui theihna hun a ni dawn a, kan theihtawpin kan inbuatsaih ang," a ti a, an phur thu Vanglaini a hrilh - Mumbai-ah hian Lianzuala bakah Lalengmawia Ralte, Hmingthanmawia leh PC Rohlupuia te an awm bawk.

An ṭha tlang

Al Hilal chanchin sawi nawn a ngai lo a, Benfica boss hlui Jorge Jesus enkawl team hi Asian football-a rorel tur khawpin an ṭha tawk - thiamna anga teh chuan hmachhawn châkawm an ni hauh lo a, mahse, an player langsarte avangin footballer tan chuan tum châkawm tak an ni lawi si!

Chutihrual chuan Mumbai hmachhawn tur club dang hi hmuh hmaih an thiang lo. Iran club ṭha Nassaji Mazandaran hian Al Hilal angin player langsar kawl lo mah se an ram inelna ngaihhlut Hazfi Cup champion nih vanga Champions League khel thei an ni a, tawh an khirh ang.

Uzbekistan Super League pahnihna Navbahor Namangan hian Serbian player khawng tak tak bakah, Uzbekistan international an kawl nual a, he team pawh hi Mumbai tan zuam chi an ni dawn lo.

Team 40 inelna AFC Champions League hi group tinah team pali zel awmin, group 10-ah ṭhen an ni a, a sang ber ṭheuhin last 16 an lut chiang ang - west leh east region-ah ṭhen an ni a, group 10 tawpa khaikhawm tawh loin region-a pahnihna ti ṭha pathum ve vein last 16 an lut bawk ang.