Zaninah Chelsea an tho chhuak dawn?

Nipui bazara sum hmang tam Chelsea-in zanin dar 12:30 hian Premier League kai thar Luton Town an mikhual dawn a, Mauricio Pochettino hoten hian chak hmel an la hmuh loh avangin Luton lakah point thum hlawh chhuak ngei an tum ang.

Blues an chungnung

Chelsea leh Luton te hi ṭum nga an inkhel tawh a, London club hi vawi thum chakin inhnehtawk leh chak loh vawi khat ve ve an nei. Blues hian match nga aṭang hian goal 10 an khung a, goal li an chhuah thung.

An intumna hnuhnung pahnih chu tun hnai a ni a, FA Cup ve ve a ni. March 2, 2022 khan Blues hian 3-2 in Luton hi an hneh. Kenilworth Road-a inkhelah hian Hatters hi ṭum hnih ngawt hmahruaitu an ni a, a tawpah erawh team ṭha zawk an chungnung.

January 24, 2021 khan Stamford Bridge-ah Chelsea hian Luton hi 3-1 in an hneh a, hemi ṭuma hattrick siamtu Tammy Abraham chu Roma tan a khel tawh. Transfer-ah Chelsea-in sum an sen tam em avangin an intum hnuhnun ber leh tun ṭuma team hi chu an danglam tawh hle.

Insiamṭhat ngai

Chelsea-in Premier League match hmasa berah anmahni ang bawka team ṭha Liverpool an mikhual a, 1-1 in an inhnehtawk. Blues hi Reds lakah an che chhe lo a, Enzo Fernandez chu player hmuhnawm niin point khat chauh hlawh chhuak mah se hmabak an nei êng hle.

Kar liam ta Pathianni khan Blues-in West Ham an tlawh a, beisei angin an khel ṭha chhunzawm lo. Reds laka fak hlawh Enzo-a'n penalty a hlah a, amah ang bawka manto Moises Caicedo chu second half-ah rawn lutin penalty a chawi.

Hammers lakah Blues hi 3-1 in an tlawm a, goal khungtu Carney Chukwuemeka chu khup hliam vangin kar ruk chhung a chawl dawn. Chelsea an khel ṭha tawk lo a, West Ham-in a tawp lam minute 23 chhung player 10-a an khel chungin goal an khung belh lo.

Match hnih aṭanga point khat hlawhchhuah hi champion tum Chelsea tan a ṭha tawk lo a, Luton lakah Argentine manager Poch-a leh a hote hi an insiamṭhat ngei a ṭul dawn a ni.

Luton lam hi...

Luton hi kum 138-a upa club a ni a, club ropui tia sawi tur an ni lo. Premier League awm hmain English football inelna sang ber khel tawh mah se Premier League erawh an vawi khat khelhna a ni.

An khelmual Kenilworth Road hi entu 10,356 lenna chauh a ni a, Premier League khelhna tura a ṭhat tawk loh avangin chei ṭhat mek a ni. Season ṭan hmaa an peih hman loh avangin 'home match' an la khel thei lo.

Kar liam ta khan Luton hian match an nei lo a, league match hmasa ber an khelhah erawh Brighton & Hove lakah 4-1 in an mualpho. Goal khat an khung chhun pawh penalty aṭanga an khung a ni a, Brighton hian chance ṭhahnem tak an hlah.

Luton hian Premier League-a tawnhriat nei ṭha Tim Krul an lalut a, chutihrualin kum 35 mi Krul hi a hnawng ve ṭan tawh. Inchhuanna atan hman chi a ni lo.

Aw kar a hla

Luton vanduaina chu an stadium peih hman lo hi a ni a, Burnley hmachhawn hman se an nihna tak a hriat theih tur. Tun ṭuma an hmachhawn tur Chelsea hi chuan transfer-ah pawh player lei nan £600m chuang an hmang a, Luton erawh £17m an hmang pha ve chauh.

Hei vang tak hian Chelsea tan hnehna chan loh chu mualphona a ni dawn a, Luton lakah chhuanlam neih a thiang lo. Blues hian team ṭha deuh chu tum se inhliam chhuanlam theih a ni. Tun dinhmunah Chelsea hian player pariat an inhliam a, chung zingah chuan player pawimawh Christopher Nkunku leh Reece James te pawh an tel.

Mahse, Poch-a chhawr theiha awm ho hi an la ṭha tawk. Liverpool aia Chelsea thlangtu Caicedo-a'n a bul ṭanna ṭha lo dah ṭhain Luton lakah hming chher a tum dawn. Training-na lamah pawh Caicedo hi a hmuhnawm hle.

Nicolas Jackson pawhin a dinhmun a sawhnghet nan goal a khung a ṭul a, Arsenal awh em em Mykhaylo Mudryk pawhin a theihna a lantir a hun tawh. Player thar ṭhahnem tak awm mah se Raheem Sterling a la pawimawh a, English forward hi Luton tlarhnung tan a hnawksak ang.