Silva-a'n contract thar a ziak

Bernardo Silva chuan Manchester City tan kum khat daih contract thar a ziak. Premier League champion tan hian kum 2026 thleng inremna an ziak tihna a ni a, a contract hmasa khan kum 2025 thleng daih a ni.

Portugal midfielder hi kum 29 mi a ni tawh a, tun nipui bazar lai khan Paris Saint Germain leh Saudi Arabian club Al-Hilal aṭangin sawmna duhawm tak a dawng, a hmain Barcelona chu lakluh tumin hma an lo la tawh bawk.

Pep Guardiola-a'n player chhuak duh a chelh ngai meuh lo, mahse midfielder Silva erawh an mamawh. Captain Ilkay Gundogan leh Riyad Mahrez te an chhuah avangin a pawimawhna a sang zual.

Citizens tan Silva chelh theih hi thil lawmawm a ni a, tun season-ah pawh rinrawl a ni leh ang. Silva chuan, "Manchester City tan hian kum ruk chhung hun duhawm ka hmang tawh a, ka chhunzawm zel thei tur hi ka lawm hle.

"Season hmasa phei kha chuan treble champion kan ni hial. Kuminah pawh hlawhtlinna chan leh kan tum dawn a, ka ṭhiante hi keimah ang bawkin hlawhtlinna chan chakin an la tuihal reng," a ti a, coach Guardiola leh a player puite chu thawhpui nuam a tih thu a sawi bawk.

Spanish manager Guardiola-a'n Man City a enkawl chinah Silva hian dinhmun pawimawh a la luah char char. Pep leh Silva te hian Premier League nomawi panga an chawi dun tawh a, season hmasa khan inelna hrang hrangah match 55 a inlan a ni.

Man City director of football Txiki Begiristain chuan, "Bernardo hian Etihad Stadium-a hun a hman chhungin a che ṭha hle a, ani ang theihna nei sang leh player danglam bikin contract a pawtsei hi kan lawm takzet," an ti.

Silva-a'n contract a ziak lai hian defender Aymeric Laporte erawh a chhuak dawn. Spanish defender hian Saudi Arabian club Al-Nassr chu kum nga leh a chanve chhung atan a zawm dawn - Man City thlahna thu pawh instagram lamah a sawi tawh a ni.