Aces siam hnem ber Isner a chawl dawn

US Open 2023 khelh zawh rualin John Isner chuan tennis a chawlhsan tur thu a sawi. American star hian tennis a khelh hun chhungin vawi 14,411 zet aces a siam tawh a, ani aia siam hnem an awm lo.

Kum 38 mi Isner hian aces siam hnem record chauh ni loin, grass court inelna lian Wimbledon bikah pawh match rei ber record siamtu a ni. Kum 2010 khan Nicolas Mahut nen darkar 11 leh minute nga chhung tehmeuh an inkhel a ni.

Nomawi hrang hrang 16 chawi tawhtu Isner chuan, "ATP Tour-ah kum 17 chhung hun ka hmang ve ta a, tunah chuan ka tan professional tennis chawlhsan a lo hun ve tawh.

"Nun inthlak tur hi a harsain lung pawh a leng nghal hle. US Open hi ka tan tournament hnuhnung ber a ni dawn, tunah chuan ka tan chawlh a hun a ni tih hi ka pawm thiam a ngai tawh a ni," tiin a sawi.

Tun season chhunga Grand Slam hnuhnung ber tur US Open hi August 28 aṭangin New York khawpuiah khelh a ni dawn. Tualchhung tlangval Isner tan tournament hnuhnung ber a nih dawn avangin season dang aiin ṭantu a ngah zual hlein a rinawm.