Real tana Kepa inlan hun a thleng ta

Thibaut Courtois inhliam vanga Real Madrid-in an lakluh, Spanish goalkeeper Kepa Arrizabalaga tan Madrid khaw club tana si ban nghahna hun ṭha a inher chhuak ta - zanin dar 1:00 hian Celta Vigo an lenchilh dawn.

Kepa hian Real hi season khat chhung loan-a khel turin a zawm a, mahse, Chelsea keeper hian Spanish club-ah chuan a ngheta luh theih a beisei thu a sawi - chumi tur chuan a chet ṭhat a pawimawh.

Kum 28 mi keeper hi Real leh Almeria an inkhelh ṭum khan Santiago Bernabeu-ah lakluh a ni tawh a, mahse, second choice keeper Andriy Lunin chuan si ban a la nghak rih.

Spanish media-te chuan zaninah Kepa hian goal a veng tawh dawn niin an sawi a, an match hmasa pahnihah Lunin hian goal khat chiah a chhuah avangin Kepa tan chetsual a thiang dawn lo.

Benitez-a team

Rafael Benitez hi football khawvelin an hmelhriat dan langsar ber chu Liverpool boss hlui a nihna a ni - tunah chuan Benitez hian Celta Vigo a enkawl tawh a, Saudi Arabia aṭanga sum mawm ṭha tak nena sawmna hnarin Spanish club hi a enkawl.

Mahse, Benitez hian beisei angin season bul a ṭan lo - an match hmasa berah Osasuna chu 2-0 in mahni mualah an ngam lo a, Real Sociedad chu 1-1 in an inhnehtawkpui zui. Tunah Real an tum dawn!

Valencia-a ropui taka hming chhertu, a hnua Liverpool enkawltu Benitez hian Real Madrid Under-17 aṭangin a coaching career a ṭan a, June 2015 khan Real hian an club enkawl turin kokir mah se, January 2016-ah an ban.

Kum 63 mi coach hian a club hlui lakah phuba lak a châk ang tih a chiang a, mahse, chuti maia awlsam erawh a ni dawn lo - Goncalo Paciencia leh Carles Perez a chhawr thei dawn lo a, tlarhmaah tawnhriat nei ṭha Iago Aspas-a'n mawhphurhna a lak thiam a ṭul ang.

Real an ṭha

European football-ah Real ṭhat thu sawi hi thuthar a ni lo - tun season-ah pawh rinlawk ang ngeiin bul an ṭan ṭha a, match hmasa berah Athletic Bilbao chu 2-0 in an hneh a, an match hnihnaah Almeria chu 3-1 in an hneh bawk.

Zaninah Celta Vigo an lenchilh ang a, hnehna chan ngei an duh dawn - Real tan Jude Bellingham chuan an match hmasa pahnihah goal thum a khung nghal a, English midfielder hi ven bik ngai leh tur a ni ang.

Goal khung khawl Karim Benzema-a'n Saudi lam pansan tawh mah se, a hmun ruak hnawhkhat turin Vinícius Júnior leh Rodrygo an la awm a, Brazilian forward pahnih hi Benzema hmun ruak luah turin an ṭha tawk.

Hetihlai hian Dani Ceballos, Ferland Mendy, Eder Militao, Thibaut Courtois leh Arda Guler te chu hliam vanga chawl tur chiangsa an ni a, tlarhnung lam hi Carlo Ancelotti tan lu tihaitu a tling mai thei.

Transfer thawm

Real ṭhat thu kan sawi rualin club lamah chuan induhkhawp lohna a la awm reng a, Paris Saint-Germain forward Kylian Mbappe chu tun nipui chhung ngeia lakluh an tum dawn niin khawthlang media-te chuan an tarlang.

PSG nen rei tak an inhmuhthiam loh hnuah Mbappe hian club training zawmin, match pawh a khel leh tawh a, mahse, Real chuan French striker hi lakluh ngei an duh niin an sawi.

Hetihrual hian Real hian pound maktaduai 149 aia sanga Mbappe hi lei an tum loh laiin PSG hian £213mtd tala hralh an duh a, Real thuneitu lam chuan he thil hi 'nuihzatthlak' an ti, niin Spanish media ṭhenkhat chuan an tarlang!

German chanchinbu lar Bild chuan Real hian August 29 - September 1 inkar hian PSG hi an dawr leh dawn niin an sawi bawk a, transfer bazar-ah beisei loh thil thleng thei a la awm nual dawn niin a lang.