East Bengal leh Gokulam intawng dawn

Durand Cup khelh mekah zanin dar 6:00 hian East Bengal leh Gokulam Kerala an intawng dawn a, quarterfinal match hnihna hi Salt Lake Stadium, Kolkata-a khelh tur a nih avangin East Bengal hi an dinhmun a ṭha zawk, tiin a sawi theih.

East Bengal hian Mizo defender ṭha Lalchungnunga leh rawlthar ṭhangduang Vanlalpeka Guite an kawl a, Mizo player pahnihin Kolkata club-ah hmun an chang ṭhin.

Carles Cuadrat-a enkawl East Bengal hian group A-ah an hmelma kumhlun Mohun Bagan, Bangladesh Army leh Punjab FC awmpuiin, point sarih an hmu a, quarterfinal an lut.

Kolkata derby-ah Bagan meuh hnehin, Bangladesh sipai team an inhnehtawkpui a, ISL club thar Punjab FC an hneh bawk - an inrintawk vanglai tak a ni a, Kerala club paltlang theih an inbeisei ang.

Gokulam-in Mizo player an kawl ve tho a, Mizo keeper tawnhriat nei ṭha Zothanmawia chu an si ban nghaktu niin, Mizo dang erawh kawl an nei lo thung.

Kerala club hian an match hnuhnung berah Bengaluru ngam lo mah se Indian Air Force leh Kerala Blasters an hneh avangin an tlang a, quarterfinal-ah East Bengal hneh theih an inbeisei ang.