Aston Villa chak nuamsa

Europa Conference League playoff-ah Aston Villa chuan Hibernian 5-0 in an sawp a, coach Unai Emery enkawl Villa hian khualmuala hnehna an chan chian êm avangin tlang turin an dinhmun a ṭha tawk ta hle.

Easter Road-a inkhelah Scottish Premiership club Hibernian an che thei lo, mikhual Premier League club lam tan Ollie Watkins-a'n hattrick a siam; England striker bakah hian Leon Bailey leh Douglas Luiz chuan goal khat ve ve an khung bawk.

Villa defender Lucas Digne a langsar, ani hian Watkins-a goal khung tur pahnih leh Bailey tan a siamsak a, goal venhimna kawngah tha a thawh hlawk hle bawk a ni.

Team pahnihte hi August 31, Ningani zanlaiah an intawng leh ang. Second leg an khelhna tur hi Villa Park a nih dawn avangin Emery naute tan hna hautak thawh tur a awm tawh lo ang.

Villa manager Emery chuan, "A tir aṭang khan kan khel ṭha êm êm a, kan khelh ṭhat êm avangin kan khingpui khan an tum angin an khel ve thei ta lo a ni, goal nga faia chak em em chu kan phu lo a ni mai thei a, hnehna chan phu zawk erawh kan ni.

"Tunah hian hmabak kan la ngah hle, a hmasa berah chuan group stage thlen phak phawt kan tum ang. Chumi hnuah thil dang kan ngaihtuah leh chauh dawn a ni," a ti a, goal chhuah loa an chak thei chuan a tihlawm thu a sawi bawk.

Aston Villa hian Premier League season ṭanna inkhelah Newcastle an ngam lo, Magpies lakah 5-1 ngawtin an mualpho. An match pahnihnaah erawh Everton 4-0 in an hneh thung - Europa Conference League lama result an neih ṭhat zui avangin an lawm ang.

Chak lo zawk Hibernian manager Lee Johnson chuan, "Inkhel kha uluk taka thlir chuan 5-0 ni tur khawpin kan khel chhe lo. A bik takin first half-ah phei kha chuan kan inrem dan pawh a fuh hle niin ka hria.

"A hnu lama Villa-in min nawr tak vak khan tihsual kan ngah ta deuh a, goal khung theihna remchang awm ve tur angah kan offside nasa bawk. A khaikhawm nan chuan pawisa kan inngah hleih a, squad a inchhah hleih êm a ni," tiin a sawi.

Hibernian hian Scottish Premiership lamah pawh season bul an ṭan fuh lo, match hnih an khelh tawh chinah an tlawm ve ve. Team 12 inel zingah anmahni leh St. Johnstone te chauhin chak ni hmel an la hmu lo.