Nottingham player thar Montiel

World Cup 2022 champion Argentina team zinga mi Gonzalo Montiel chuan Nottingham Forest chu season khat chhung loan-a khel turin a zawm a, Premier League club hian a ngheta lakluh theihna dan an nei bawk.

Montiel hian Sevilla aṭangin Forest hi a zawm a, World Cup final penalty-a Argentina-in France an hneh khan, penalty hnuhnung ber petin, Argentina tan a chhuih goal a, Lionel Messi hoin an champion a ni.

Kum 26 mi Montiel chuan, "Beiseina sang tak nei chungin he hmun hi ka lo pan a, match tam tak khelh a, ka theihna pholan theih ka inbeisei a ni," a ti a, Forest-ah hian number 29 a ha ang.

Argentine right back chuan sawi zawmin, "Nomawi chawi zel ka duh a, he hmunah pawh hian nomawi chawi ka duh a, kan tithei tih pholan hun a ni," a ti a, hei erawh Forest tana khel chung chuan a harsa deuh mai thei!

River Plate aṭanga inzir chhuak defender chuan a naupan lai aṭanga Premier League a en ṭhin thu sawiin, "Naupan tet aṭanga Premier League en ṭhin ka ni a, player kan nihna ang chuan khawvela league ṭha bera khelh hi kan duh vek - chu chu Premier League hi a ni," a ti.

Argentina tana vawi 23 inlan tawh defender hian River Plate-ah match 139 khela goal ruk khungin, Argentine Primera División (1), Copa Argentina (3), Supercopa Argentina (2), Copa Libertadores (1) leh Recopa Sudamericana (1) ah te champion nomawi a chawipui.

August 2021 khan Sevilla zawmin, season hmasa khan Europa League nomawi a chawipui a, season hnih chhunga match 72 khelhsakin, goal hnih a khung a ni - Europa an champion ṭum pawh hian penalty-ah a tawp kharin a khung a, boruak sang a ngam hle.

Forest chief football officer Ross Wilson chuan, "Gonzalo leh a chhungte Nottingham-a kan lo lawm thei hi kan lawm hle. A career-ah thil ropui tak tak a tawng tawh a, Forest-a a hma hun tur pawh phur takin a thlir a ni," a ti.

Steve Cooper-a enkawl Forest hian Montiel chhiar telin tun nipuiah player thar panga an la lut ta a, Premier League inhamtan chu an thupui ber tur a ni ang.