AFC Cup-ah Bagan leh Odisha

Asia khawmualpuia club football inelna sang ber dawttu AFC Cup draw chu nimin khan neih a ni a, AFC Cup khel tura inpettling hlim Mohun Bagan Super Giant chu group D-ah Odisha, Bashundhara Kings leh Maziya S&RC te nen an awm ho.

Bashundhara Kings hi Bangladesh champion niin, ISL club Mumbai City assistant coach hlui Óscar Bruzón enkawl an ni a, Fluminense winger hlui Robinho chu an player langsar kawl a ni. Maziya S&RC hi Maldives champion lai an ni a, group D-ah chuan team nem ber tura ngaih an ni.

Mohun Bagan hian preliminary round 2 aṭanga inelna hi hmachhawn ṭanin, an match hmasa berah hian Nepal club ṭha Machhindra FC chu 3-1 in an hneh a, playoff round-ah Abahani Limited Dhaka chu 3-1 in an hneh leh bawk.

Hetihlai hian Odisha erawh AFC Cup khel tur hian tling chiangsa an ni a, anni hian Super Cup 2023 champion nomawi chawiin, Indian club playoff-ah 2021-22 I League champion Gokulam chu an hneh a ni.

Odisha hi ISL-a Mizo player tamna ber niin, Mizo player 10 ngawt an kawl a, goalkeeper Lalthuammawia Ralte, defender Jerry Lalrinzuala, Laldinliana Renthlei, midfielder Isaac Vanmalsawma, Lalliansanga Renthlei, K. Lalṭhathanga, Paul Ramfangzauva, forward CVL Remtluanga, Isak Vanlalruatfela leh Jerry Mawihmingthanga te an awm.

Defender Lalhrezuala Sailung chu Odisha FC hian an nei bawk a, ani erawh Aizawl FC lamah loan-in an kaltir thung a ni. Hetihlai hian Mohun Bagan pawhin Mizo player kawl an nei tho a, Kolkata club-ah hian midfielder Lalrinliana Hnamte a awm.

AFC Cup hi European football-a kan hmuh ṭhan, knockout tournament angin kalpui a ni chiah lo - Odisha leh Bagan awmna group aṭang hian team pakhat chiah an tlang dawn a, group hmahruaitu hian Inter-zone playoff semifinal an khel ang.

Inter-zone playoff semifinal-ah hian zonal final-a chak chu an hmachhawn leh ang a, an chak chuan Inter-zone playoff final an khel leh phawt ang - heta an chak leh chuan final tak tak an hmachhawn dawn chauh a ni.