Inrinni tlaiah MPL10 match hmuhnawm bik: Chhinga Veng FC vs Mizoram Police FC

Vawiin tlai dar 3:00 hian MPL10-ah champion rinkai pahnih Chhinga Veng FC leh Mizoram Police FC te an inkhel dawn. I Day Football-a club pahnih inkhelh ṭumin goal kua ngawt a lut a, injury time-a MS Dawngliana goal hmangin Chhingcows 5-4 in an vannei ta zawk.

MPL10-ah club lian pahnih hi an inkhel lehnghal dawn. Coach ṭha pahnih Lalsangzuala Hmar leh coach Lalbiaksanga Colney te an inhmachhawn nghal dawn a, Sanga leh BS-a Colney te vang hian inkhel en a châkawm sawt.

Intawnna hmasa

I Day Football-a an inkhelh ṭum khan Chhinga Vengin bul an ṭan ṭha a, inkhelh ṭantirh lamah Police-in an ngam lo hle. Amaherawhchu, Police team hian goal hnih an chhuah hnuah pawh a chhanletna an nei zel a, an tawnhriat ṭhat bakah player quality sang hmuh tur a awm.

Chhinga Vengin Isak Malsawmkima leh Johny Lalremruata te hmangin minute 10 chhungin goal hnih an khung hman. Minute 30 a nih meuh chuan Lalbiakhlua leh Lalfakzuala te hmangin Police-in an sut.

First half-ah Suanngaih-muana'n Chhingcows tan a khung belh a, second half ṭan deuh chiahah Dawngtea'n penalty aṭanga khung belhin 4-2 a ni. Mahse, Lalbiakhlua (Hlutea) goal hnih hmangin minute nga hnuah an sut zo vek.

Hun tawp dawn hnaiah Chhinga Vengin penalty an hmu a, Dawngtea'n a hlah. Amaherawhchu Dawngtea hian a tihsual siamṭhatna hun a nei a, injury time-ah Isac Zomuanpuia freekick pet ṭha zet chu a tauh goal.

En châkawm chu

Chhinga Veng tlarhmaah Dawngtea leh Amuana te an hmuhnawm a, mual sir aṭanga an thlawp ṭhat bawk avangin Police tlarhnungin dan ngaihna an hre lo. Police defender zinga tawnhriat nei ṭha ber Lalhmunmawia'n penalty ṭum hnih ngawt a chawi a, a fimkhur tawk lo. BS-a Colney-in a tlarhnung rem phui a tum dan hi en châkawm chu a ni.

Sanga pawhin insiamṭhatna tur a ngah a, Police tlarhma an dang thiam tawk lo. Goal khung lo turin Malsawmfela dang thei mah se goal li luhnaah hian Sawmfela a pawimawh ṭhin hle. Chhingcows tlarhmain Police tlarhma an dan dan tur an thlak a ngai dawn a, Sanga'n engtin nge player a rem dawn tih hriat a châkawm hle.

Chhingcows midfielder-te hi hming langsar lo zawk an ni a, amaherawhchu I Day Football a zawh meuh chuan Lalnunzira (Zirtea) chu best player-ah an thlang. A kawppui Johny Lalremruata a che ṭha bawk. Police lamah hming langsar zawk R. Malsawmtluanga leh H. Lalbiakthanga te an awm a, kum upa zawk leh naupang zawk inhmachhawn tur hi hmuh a châkawm. Chutihrualin I Day Football-a an inhmachhawn hmasak ṭum ang chiahin player an rem nawn a rinawm loh thung.

MPL10-ah inkhel hmuh-nawm a ṭhahnem dawn a, chung zinga en châkawm chu vawiin tlaia inkhel tur hi a ni. Tualchhung football tuimite tan hmaih phal chi a ni lo ang.