Chanmariah Sialhawk tlangval Danmawia

26th August, 2023

Chanmari FC-in MPL hmasa ber best player R. Laldanmawia an la lut a, vawiin chhun dar 12:00-a FC Venghnuai an hmachhawn hunah a inlan nghal ang. MPL10-ah MPL best player hmasa ber a rawn kir e.

Sialhawk tlangval Danmawia hi tualchhung football ngainatute tan hriat loh chi a ni tawh lo. Sialhawk Express tia sawi lar Danmawia hian MPL hmasa berah Dinthar FC a champion pui a, best player-ah an thlang.

Champion thei bik player a ni a, Danmawia hian veng/khua inelnaah nomawi a chawi fo tawh. I League-a Aizawl FC an champion ṭum khan minute 994 a inlan a, vawi 11 starting eleven changin champion-na kawngah player pawimawh a ni. Santosh Trophy-a Mizoram an champion ṭum pawhin a pawimawh a, a bik takin qualifier-a Manipur laka Lammuala a goal khung kha a hlu hle.

Danmawia hian Aizawl FC a chhuahsan hnuin East Bengal, Hyderabad leh NorthEast United-ah te a khel a, tunah a club khelh tawhna Chanmari FC-ah a rawn kir.

Chanmari FC coach K. Malsawmkima chuan, "Danmawia hian training a rawn zawmna a rei tawh a, kan bula a rawn practice hma pawhin professional player ho zingah ngawrh takin training a nei. Venghnuai kan khelh hunah a inlan nghal dawn," tiin Vanglaini a hrilh.

Coach Mala hi MPL-a Aizawl FC champion hmasak ber ṭuma an coach kha a ni a, Chanmari FC hi MPL nomawi chawipui leh ngei a tum. Hlawhtlinna an chan ngei theih nan club lamin an thlawp ṭha a, player ṭha an pe. Tlarhmaah Kelkang tlangval Lalkhawpuimawia'n (Mapuia) bul a ṭan thei tawh dawn a, Chanmari aṭangin attacking game a beisei theih ang.

Chanmari khingpui tur FC Venghnuai hi season liam taa finalist kha an ni a, team enkawltu coach K. Lalthlamuana hian Central YMA Football inelna neih zawh takah khan Venghnuai a champion pui. Match hmasa berah erawh Thlamuana hian coach training a neih avangin a telpui thei dawn lo.

Venghnuai hian I Day Football-ah group stage an paltlang lo a, MPL-ah erawh zuam ngawt an rem lo. Player tawnhriat nei ṭha C. Ramdinmawia'n tlarhnung a ho dawn a, tlarhmaa lamah Jerry Lalchhanchhuaha, J. Lalbiakliana leh Jessy Vanlalmuana te an awm. Chanmari tlarhnung a phui bik loh avangin team pahnih hi an inhnehtawk a nih pawhin goal a luh ngei a rinawm hle.