Inter Village Volleyball awm dawn

Mizoram Volleyball Association (MVA) chuan Inter Village Volleyball Tournament a buatsaih dawn. Khua leh khua, veng leh veng inelna lian hi September 19-29 chhungin R. Dengṭhuama Indoor Stadium, Mualpuiah khelh a ni ang.

MVA-in kum hnihna zelah Inter Village Tournament a buatsaih ṭhin a, Covid-19 leng avangin 2021-ah a huaihawt thei lo. A hnuhnung ber kum 2019 khan mipa team 52 telin Maubawkin final-ah 3-1-in Hunthar an hneh a, hmeichhe team 18 tel zingah Kolasib Diakkawn an champion a, final-ah 3-0-in Thenzawl East an hneh.

Veng leh khaw hrang hrang inelna Central YMA volleyball tournament hnuhnung ber nikumah mipa team 104 leh hmeichhe team 39 an tel a, mipa lamah Hunthar champion-in Bungkawn hmeichhe team an champion bawk.

Pro Volleyball League (PVL) an khel zo a, tualchhung volleyball ngainatute an phur thar - MVA chuan kuminah hian team inlan an tam an beisei. MVA general secretary C. Lalrokhuma chuan, "Veng leh khaw hrang hrang inelna tur a nih angin All Mizoram Village Council Association leh Aizawl City Local Council Association remtihna leh hriatpuina thlapa buatsaih tur a ni a.

"Kum dang zawng aiin team tel an ṭhahnem ngei ang tih a beiseiawm a, Local Council leh Village Council tin tel turin kan sawm nghal a ni. Tun kum hnih thum chhungin Mizoramah volleyball boruak a lian tharin khel an tam zual hle a. Nikum leh kumin boruak aṭangin team tel an tam viau dawn tih a hriat theih," a ti.

MVA chuan kum tina veng leh khaw inelna a awm theih nan Central YMA volleyball tournament a awm loh kumah inter village tournament an huaihawt ṭhin a. Mizoram inelna sang ber Pro Volleyball-a an thawhpui LPS Vision chuan live-in inkhel a pe chhuak ang.