Newcastle vs Liverpool - team pahnih tan fiahna!

Pathianni zan dar 9:00-ah Newcastle United chuan Premier League match khel turin Liverpool an mikhual dawn a, he inkhel hi team pahnih tan fiahna tur a ni, tiin sawi ngam a ni.

Eddie Howe-a hoin Magpies hian season hman zawh takah ṭha takin an khel a, Champions League khel turin an inpetkai - an phur bawk a ni ang, season thara an match hmasa berah Aston Villa chu 5-1 in an sawp nghal.

Mahse, he team hian a hnuah UEFA Super Cup khel chau leh squad kim lo Manchester City an ngam lo a, tam takin he team hi club ṭha ber ber nena inel turin an la nem deuhah an ngai - Pathianni zan hi ringhleltute chhanletna hun ṭha a ni.

Season hmasaa beisei phak lo Liverpool pawh an mangchhia aṭanga thawhharh tum mek an ni a, mahse, Reds fan-ten an duhthusama match ṭha an la hmu lo - Magpies hi khualmualah an hneh a nih chuan an inringtawk sawt ang.

Fiahna hun

Newcastle Boss Eddie Howe chuan Liverpool ang club lian hmachhawn chu an tan fiahna pawimawh a nih thu a sawi. English coach chuan, "Team ṭha tak an ni a, manager ṭha takin a enkawl bawk.

"Tun hnaiah beisei phak lo mah se team ṭha tak an la ni reng. Reds hi hneh ila, kan point hmuh tur zat chu point thum tho a ni. Mahse, hetiang inkhela chakna hi chuan team-ah hna a thawk ṭha bik a, inrintawkna min siam thei a ni," a ti a, Liverpool nena an inkhel tur pawimawhna a hai lo.

Howe chuan sawi zawmin, "Season hmasaah pawh khan team langsar hneh kan nei nual a, khangte khan kan kal zelnaah min pui. Tunah pawh theihtawp kan chhuah ang," a ti - Chelsea aṭanga lei thar Lewis Hall a inlan theih thu a sawi a, Joelinton leh Javier Manquillo ten training an zawm leh tawh bawk.

Magpies tan Reds tudawl turin an player neih langsarte an chet ṭhat lehzual a ṭul dawn a, midfield-ah Bruno Guimaraes, Sandro Tonali leh Joelinton te an chet ṭhat a ṭul a, tlarhmaah Alexander Isak a ṭangkai bawk ang.

A harsa dawn

Liverpool-in match hnih an khelh aṭangin point li an hmu a, mahse, goal an chhuah ve ve - Reds hian season hmasaa an buaina tlarhnung an la chingfel lo a, defensive midfielder ṭha an mamawhna a la sang reng.

Mahse, Reds boss Jurgen Klopp-a'n a mamawhte a chan theih loh avangin squad Cody Gakpo chu midfield-ah a chhawr a ṭul ṭhin a, midfielder ṭha Dominik Szoboszlai leh Alexis Mac Allister lah tlarhnung venpui aia goal nawrpui nuam ti zawk an ni.

Liverpool tana lawmna erawh Bournemouth laka red card hmu Mac Allister hremna tihnepsak a ni hi a ni a, match thum khel thei lo anga lang hman midfielder hian Pathianni zan aṭangin khelmual a lut lehnghal thei dawn.

Hliam tenau nei Trent Alexander-Arnold chu Magpies hmachhawn turin a dam tawh a, centre back Ibrahima Konate dinhmun a chiang lo thung. Thiago Alcantara leh Curtis Jones chu inlan thei lo tur chiang an ni bawk.

A chhehvel

Inkhel lama rilru pek a ngaih vanglai takin Reds hi chanchin dangin a bawh buai a, an thiampuipa Mohamed Salah chu Al-Ittihad chuan khawvela footballer hlawh hnem ber ni tura thlem luh an tum niin an sawi.

Mahse, Klopp chuan, "Kan thlirna aṭang chuan engmah sawi tur a awm lo. Lo awm ta pawh ni se, kan chhanna chu 'Aih' tih hi a ni mai ang," a ti a, a forward goal khung thei bik chu chhuahtir an tum loh thu a sawi chhuak.

Klopp chuan Magpies nena an inkhel tur thlirlawk zuiin, "Team ṭha tak an ni a, an phu ang ngeiin Champions League an khel dawn bawk. Eddie Howe-a hnuaiah transfer ṭha tak tak hmangin, hma an sawn hle.

"Sawi bik neih a ṭha ka ti lo a, mahse, Tonali leh Harvey Barnes phei chu transfer ṭha tak a tling. He team hi an phur vanglai tak a ni a, chuvang chuan a harsa dawn tih ka hria a ni," a ti a, St James' Park-ah an fimkhur tur thu a sawi.