Jesus-a'n training a zawm thei ta

Arsenal striker Gabriel Jesus chuan Ningani khan team training pangngai a zawm thei tawh. Gunners hian zanin dar 7:30 hian Fulham an mikhual dawn a, an player ṭha hi an chhawr nghal dawn em, tih erawh hriat a la ni lo thung.

Season hmasa khan Jesus hian Arsenal tan a khel ṭha hle, mahse Brazil tan World Cup a khelhnaah a inhliam, a khup hliam vangin thla li chhung a chawlh a ngaih phah hial a, season tawp lamah erawh a lo kir hman.

Tun season tur inbuatsaihna ṭha takin a hmang a, mahse a khup bawk a hliam. Zai tenau a tawh avangin Premier League match hmasa pahnihah a inlan lo - a tel loin Nottingham Forest leh Crystal Palace chu an hneh.

Jesus awm loh laiin Eddie Nketiah-a'n a hmun ruak a luah, English striker hian an match hmasa zawkah goal khungin a hnuhnung zawkah penalty a hlawh chhuak a, an chak theih chhan a ni.

Mikel Arteta-a'n Jesus hi a inkhelhtir a nih pawhin minute 90 chu a la khel lo ang, bench lamah hun a hman hmasak zawk a rinawm. North London club player ṭha zingah hliam langsar an awm lo a, point thum hmuh ngei tumin Fulham an mikhual thei ang.

Heihlai hian Kieran Tierney erawh Real Sociedad lamah loan hmangin a kal dawn a, season khat chhung hun a hmang ang. Club pahnih inrem danah chuan a ngheta lei theihna a tel dawn lo, inkhelh tam duh vanga kal chhuak a ni dawn.