Zaninah Mizo boxer pali an inlan dawn

Inrinni zan dar 6 aṭangin Kolkata-ah The Punch 10 professional boxing series ṭan a ni dawn a, inhnek vawi kua awm tur zinga a hmasa berah NT Lalbiakkima'n Thai boxer Kittipong Jareonroy a hmachhawn dawn.

Biakkima hian NTP Boxing Training Centre, Chite Veng, Aizawlah training a nei, ani bakah hian F. Zoramchhana leh Omega Lalramdina te an inlan dawn bawk a, Mizo hmeichhe zinga professional boxing khel hmasa ber turin MC Vankimmawii a tel dawn bawk.

Nt-a hian December 2020 khan professional boxing a khel ṭan a, a inhnek hmasak vawi liah knockout vekin a chak zawn a, IBA intercontinental title a lak hnuah nikum June 18 khan Dubai-ah WBC Asian Continental Lightflyweight title a chuh a, Jayson Vayson hneh lovin a tlawm a, a inhnek hnuhnun ber a ni.

Kum khat leh thla hnih chuang hnuah hruihrual chhungah a lut leh dawn a, inhnek tam a duh avangin October 2-a ṭan tur Tata SK 612 LPS Pro Fight flyweight-ah a tel dawn bawk a ni.

Mizo hmeichhe zinga professional boxing khel hmasa ber ni turin NTP Boxing Training Centre-ah Ramhlun South nula MC Vankimmawii a inpuahchah bawk a, The Punch 10 inhnek hnuhnung berah Haryana boxer Chahal nen an innuai dawn a ni.

Kum 21 mi Kimkimi hian nikum khan North East Olympics leh North East Regional Sports-ah Mizoram tan silver medal a la ve ve a, kumin February khan Aizawl District Boxing Association buatsaih Mizoram Fight Night semifinal-ah (kg57) Ruthi Lalhmingṭhai, Reiek a hneh lo a ni. A hmaa ding tur kum 26 mi Chahal-i'n kumin April khan professional luhchilhin split decision-in Jyoti Shamsher a hneh a, vawi hnih a inlanna tur a ni.

Cherhlun boxer Zotea'n Bangkok-ah WBA Asia title chuh tawhin a chak zo lo va, kumin March 10 khan LPS Fight Night-ah insiam thar lehin Johan Lalrinpuia, Luangmual Vengthlang a hneh a, professional huanga vawi riat a inhnek tawhah tum nga chakin vawi thum a tlawm a, Pankaj Kumar nen an inhmachhawn dawn a ni.

LPS Fight Night-ah Dinthar tlangval, kum 20 mi Omega chuan professional luhchilhin David Laldanmawia, Lunglei a hneh a, vawi hnih a inhnekna turah professional boxing vawi nga khel tawh Gugan Kumar nen an intawng dawn a, amah aia tawnhriat nei tam lakah chak ngei a inring hle a ni.