Saitualah MPL9 champion

MPL9 champion Chawnpui FC leh Saitual DFA chuan vawiin chhun dar 2:00 hian Keifang Centenary Ground, Saitualah Charity Match an buatsaih dawn.

Chawnpui FC hian an team ṭha ber an tir dawn a, coach Lalrindika Hmarin a ho dawn. MPL9 champion hmachhawn turin Saitual DFA-in district chhunga team ṭha ber an thlang ve bawk.

Chawnpui FC chairman Er C. Lalmalsawma chuan, "Saitual DFA nena hetiang hun kan buatsaih thei hi kan lawm. Team ṭha ber kan rawn tir a, inkhel hmuhnawm chhawpchhuah kan duh. Inkhel en vek turin Saitual mipui kan sawm," tiin Vanglaini a hrilh.

Inkhel en man a awm dawn lo a, vehbur khawn a ni thung dawn. Sum hmuhchhuah hi Saitual District Poor Fund-ah dah luh a ni ang.