Villarreal khelmualah Barcelona an leng dawn

Spanish La Liga-ah Pathianni zan dar 9:00 hian inkhel hmuhnawm en tur a awm dawn a, Villarreal chuan Barcelona an mikhual dawn - team pahnih, beisei anga bul ṭan lo, insiamṭhat tum ve ve an intawng dawn a, an match hnuhnung bera an chak ve ve avangin an phur ang tih a chiang.

Villarreal hian an league match hmasa berah Real Betis chu 2-1 in ngam lo mah se, match hnihnaah insiamṭha lehnghalin, Real Mallorca chu 1-0 in an hneh a, Barcelona-in an lo hmuak zui.

Barcelona thawnthu a danglam tam lo. Champion lai Catalan club hian an match hmasa berah Getafe chu 0-0 in an inhnehtawkpui a, match hnihnaah Cadiz chu 2-0 in an hneh thung - an phur chhoh lai tak a ni.

Hetihlai hian champion tum ngam zinga mi Atletico Madrid chu Thawhṭanni zanah an inlan dawn chauh a, Rayo Vallecano an lenchilh dawn. Nizan khan Real Madrid-in Celta Vigo an lenchilh a, an result kan hre hman lo.

Barca an kim lo

Catalan club-in an phur vanglai takin chanchin lawmawm lo hriat tur an nei a, midfielder Pedri chu hliam vangin a inlan thei dawn lo. Spain international hi training-naah a inhliam a ni.

Kum 20 mi Pedri hi kum naupangtê ni chungin hliam vangin a talbuai fo a, tun ṭumah hian a tihrawlah hliam neiin, a chawlh chen tur hi he thu buatsaih a nih lai hian chiang taka tarlanna a la awm lo.

Pedri hian 2020-21 season-ah khan a hming rawn chher ṭanin, hemi season-ah hian inelna hrang hrangah match 52 ngawt a khel hman a, mahse, 2021-22 season-ah khan hliam vanga match 22 chiah khelin, season hmasaah pawh match 35 bak a khel lo.

Tun season-ah pawh match hnih chiah a khel hman tihin a inhliam lehnghal a, tun hnaia tlarhma lama chhawr ṭhin Pedri awm loh hlana Gavi kawppui turin Ferran Torres emaw Ansu Fati chu an luh a rinawm.

Khawiah nge Lewy?

Barcelona-in tun season-ah league match hnih khel tawhin, goal hnih chiah an la khung a, chu pawh Cadiz laka minute 80 hnu lama an khung ve ve a ni - he club hian goal khung thei an mamawh tih hai rual a ni lo.

Spanish champion hian European football-a rei tak goal khung khawl lo ni tawh Robert Lewandowski an nei a, season hmasa lawk pawh khan inelna hrang hrangah goal 33 khungin assist vawi riat a nei.

Mahse, ni e, mahse, tih a ngai - Polish striker hian Bayern Munich a zawm kum, 2014-15 season-a goal 25 a khung tih loh kha chu season sarih chhungin season tin Bayern-ah goal 40 khung tlin loh a nei ngai lo.

German club-a a sulhnu thlirin Barca-a a record a la ṭha tawk lo. Tun season match hnihah goal a la khung lo bawk a, sawiselnain a bawm tak tak hmain Lewy hian goal a khung leh tawh a ngai.

A chuai em ni?

Lewy hi kum 35 mi a ni ve tawh a, Borussia Dortmund leh Bayern-a a vanglai ang reng kha chu a ni tawh bik lo - a finishing la tawih reng mah se, hman angin a chak reng thei lo a, a che rang thei reng lo bawk.

Polish striker hian kumin bikah goal 10 chiah Barca tan a la khung a, heng zinga a goal khung panga chu Real Valladolid (1), Espanyol (2) leh Elche (2) laka a khung niin, club pathum hi La Liga aṭangin an relegate vek.

Lewy hian team nem deuh bak a ngam ta lo em ni, tih mai awl tak a ni a, Catalan club hian an nomawi an humhim dawn chuan Lewandowski hi a chet ṭhat a ngai - season hmasa Barca tana goal khung tam lama amah hnaih bertu Ansu Fati leh Raphinha ten goal 10 ve ve bak an khung lo!

A tawi zawnga sawi chuan Lewy bak hi Barca-in goal khung thei an nei meuh lo a, Polish striker a 'form' vat a ngai - Pathianni zana an lenchilh tur Villarreal hi Barca boss hlui Quique Setién-a'n a enkawl tih hriat a ṭha.