Hliam vangin Shaw inkhel rih dawn lo

Manchester United defender Luke Shaw chu tihrawl hliam vangin a chawl rih dawn, a chawlh chen tur tak hi tarlan ni lo mah se khawthlang chanchinbute chuan chawlhkar khat aia rei a nih ngei tur thu an sawi lang thung.

Kum 28 mi Shaw hian Man United tan Premier League match hnih a khel dawn lo a, hei bakah hian an ram England tan Euro 2024 qualifier-ah Ukraine leh Scotland a hmachhawn thei ve dawn lo bawk - international break zawh lamah a lo kir dawn chauh niin a lang.

Shaw bakah hian Tyrell Malacia chu hliam vangin a chawl mek a, left back zinga mi Brandon Williams chu Championship club Ipswich Town lamah loan hmangin a kal tawh bawk.

Erik ten Hag-a'n thutlukna hautak a siam a ngai dawn, tun hmain Diogo Dalot chu vei lamah a lo chhawr tawh a, mahse a khel ṭha tawk lo. Dutch manager hian tun kartawpa Premier League an khelh hunah a tlarhnung a siksawi a ngai dawn tihna a ni.

Manchester United hian hliam vang bawkin midfielder Mason Mount leh forward Rasmus Hojlund te an chhawr thei lo mek. Zanin dar 7:30-a Nottingham Forest an mikhual huanah an ṭhat dan berin an la khel thei dawn lo.

Ten Hag-a naute hian season bul an ṭan fuh tawk lo, sawi hlawh takin Wolves an hneh a, chumi hnuah Tottenham Hotspur khelmualah 2-0 in an tlawm, an elpui dang ten point ruk an neih tawh avangin chetsual fo a rem lo ang.