Man City player thar Doku

Manchester City chuan Rennes aṭangin Jeremy Doku an la lut. Belgium winger Doku hi pound maktaduai 55.4 man tur a ni a, season nga daih contract an ziahpui a ni.

Kum 21 mi Doku hian Ligue 1 club tan league match 75 a khelh aṭangin goal 10 a khung a, theihna nei sang leh beiseiawm tak ni mah se Etihad Stadium-ah chuan rinrawl ber a ni nghal rih lo ang.

Doku chuan, "Manchester City hi khawvela team ṭha ber an ni a, ka zawm thei hi thil lawmawm leh chhinchhiah tlak tak a ni," a ti. EPL club dang West Ham, Tottenham Hotspur leh Chelsea te pawhin lakluh duh mah se Citizens a thlang a ni.

Pep Guardiola-a'n tun nipui chhungin Doku bakah hian midfielder Mateo Kovacic leh RB Leipzig defender Josko Gvardiol te a la lut tawh a, captain Ilkay Gundogan, defender Aymeric Laporte leh Riyad Maherz te an chhuak thung.

Doku an lakluh lai hian Spain defender Aymeric Laporte chuan Man City a chhuahsan fel ve ta chiah thung. Laporte hian pound maktaduai 23.6-in Saudi Pro League club Al Nassr a zawm.

Kum 29 mi Laporte chuan, "Man City tan kum nga leh a chanve chhung hun ka hmang kha, khang hunte kha theihnghilh theih a ni tawh lo ang," a ti a, tunah chuan chona thar a hmachhawn tur thu leh Citizens ṭantu a nih reng tawh tur thu a sawi bawk.

Man City hi an manager Guardiola an zai a, chuvangin Pathianni zan dar 6:00-a Sheffield United an lenchilh hunah assistant manager Juanma Lillo hoin an khel ang.