Red Bull umphak an harsa ang - Leclerc

Ferrari driver Charles Leclerc chuan tunlai team ṭha ber Red Bull chu an tan umphak an harsat tur thu a sawi a, kum 2026 aṭanga F1 intlansiak dan kalphung an thlak hma chuan ro an rel rihin a ring.

Red Bull driver pahnih Max Verstappen leh Charles Leclerc ten F1 an thunun hneh hle a, anni pahnih tih lohah chuan Leclerc chauh hi tun season kal laia pole position chang thei awmchhun a ni hial a, intlansiak pangngaiah phei chuan team dang an la chak miah lo.

Kum 25 mi Leclerc chuan, "A nihna takah chuan team dang hmaah Red Bull hi an kal fal hle a, keini tan chuan chawpchilh taka umphak mai theih a ni lo. Tuna kan kalphungah chuan season thar atan inbuatsaih lawk theih a ni.

"Tunah chuan Red Bull chuan season thara an car tur an ngaihtuah lawk thei leh daih tawh, keini erawhin Red Bull ekphal tur neih tuma kan beih a la ngai thung, chuvangin thil hi a awlsam lo hle," tiin a sawi.

Mercedes driver Hamilton pawhin Red Bull ṭhat thu an lo sawi tawh a, tuna Leclerc thusawi pawh hi a pawmpui tih a sawi. Mahse, infiamna chhungah chuan tumah elphak loh tur an awm bik loh thu a sawi bawk.

Car intlansiakna sang ber hi season chawhma an zo tawh a, tunah chuan nipui chawlh pawh hmang zoin season chawhnu an hmang dawn. Pathianni zan dar 6:30 hian Dutch Grand Prix an tlan leh ang.