Durand Cup semifinal-ah Highlander

Indian Super League club NorthEast United chuan Durand Cup semifinal an khel dawn a, season bul ṭanna tournament-a hun duhawm tawng turin Indian Army chu quarterfinal-ah 1-0 in an hneh.

Guwahati khawpuia inkhelah Highlander tan Phalguni Singh chuan minute 51-naah inkhela goal awmchhun a khung a, Zothanpuia khelhna India sipai team-in a chhanletna tur an nei lo.

Highlander tan hian Rochharzela chuan inkhel bul a ṭan bawk a, Aizawl FC forward hlui hian a team tan goal khungna remchang nei mah se bar chung lamah a thlawh.

Durand Cup quarterfinal hi nizan khan khelh chhunzawm niin East Bengal leh Gokulam Kerala te an intawng a, he thu buatsaih a nih lai hian an result kan hre hman lo.

Zanin dar 6:00-ah FC Goa leh Chennaiyin FC an inkhel dawn a, Goan club-ah Dinthar tlangval Ayush Dev Chhetri awmin, Chennaiyin lam hian Mizoram player kawl an nei lo thung.

Pathianni zan dar 6:00-ah Mumbai City leh Mohun Bagan ten semifinal luh an inchuh dawn bawk a, he inkhel hi a hmuhnawm ang - team pahnih hian Durand Cup-ah an squad neih chhah an thawhchhuahpui ve ve a, champion an tum.

Mumbai City hian squad-ah defender Hmingthanmawia, midfielder PC Rohlupuia, Lalengmawia Ralte (Apuia) leh forward Lallianzuala Chhangte an kawl a, Mohun Bagan hian Lalrinliana Hnamte (Terina) an kawl thung.