Neymar lo zin hun tur a chiang

Asian football-a club inelna sang ber AFC Champions League-ah Indian club Mumbai City leh Neymar-a khelhna Al Hilal an awm ho a, Saudi Pro League club hi November 6-ah India rama inkhel turin an lo zin dawn.

Mumbai City hian Mumbai Football Arena chu an khelmual atana an hman ṭhin a ni a, mahse, mi 6,600 lenna stadium hi AFC chuan Champions League khelhna tur khawpa ṭha tawkah an ngai lo a, Pune-ah Mumbai hian an home match an khel dawn.

ISL club-in an khelmual atana an hman tur hi Shree Shiv Chhatrapati Sports Complex niin, mi 11,900 lenna stadium a ni - Air India, DSK Shivajians, Pune FC, Bharat FC leh FC Pune City ten khelmual atan an lo hmang tawh ṭhin.

Pune khawpui laili aṭanga 15km-a hla vela awm stadium hian 2008 Commonwealth Youth Games, Khelo India Youth Games 2019 leh AFC Women's Asian Cup 2022 te pawh a lo thleng tawh.

Mumbai hian mahni khelmuala an match khelh hmasak ber chu September 18 hian khelin, Nassaji Mazandaran an mikhual ang a, khualmuala Navbahor leh Al Hilal an hmachhawn hnuah November 6-ah Al Hilal an mikhual ve leh ang.

Al Hilal-ah hian Neymar bakah Chelsea defender hlui Kalidou Koulibaly, Wolverhampton Wanderers midfielder hlui Ruben Neves, Fulham striker chhuanvawr ṭhin Aleksandar Mitrovic, Porto striker hlui Moussa Marega, Lazio midfielder hlui Sergej Milinkovic-Savic leh Sevilla keeper hlui Yassine Bounou te chu player langsar an neih an ni.

Anni bakah hian West Brom midfielder hlui Matheus Pereira leh Flamengo striker hlui Michael te pawh an awm a, anni pahnih erawh season hmasa lam pawh khan Al Hilal tan an lo khel tawh.