A let 10-a ṭha Arsenal = Fulham

Premier League champion tum Arsenal manager Mikel Arteta chuan season liam ta aia a let 10-a an ṭhat thu sawi mah se an mual Emirates Stadium-ah player 10-a khel Fulham nen 2-2 in an inhnehtawk. Gunners hian nipui bazarah sum an hman tam avangin pressure an ngah a; September 3, Pathianni zanah Manchester United an mikhual zui dawn.

London club hian an match hmasa pahnihah hnehna an chang a, anmahni ang bawka chak ve ve Brighton & Hove Albion chu Inrinni zan khan an chesual ve bawk - nizanah Manchester City an inlan a, result kan hre hman lo.

Thutlukna leh chetsualna

Mikel Arteta-a'n player thar pathum a nei a, a theih anga chhawr ṭangkai a tum. Season hmasa lama a rinrawl ber defender Gabriel chu kuminah a la chhawr mumal tlat lo thung.

Brazilian defender hian inkhel bul a la ṭan miah lo, tlarhnung sirah Thomas Partey dah niin Ben White chu a laiah a tawlh lut leh thung, anni pahnih awmna zawnah ber kher khian Bukayo Saka a chesual.

Saka-a'n ngaihtuah chiang tawk loin a back pass a, defender White a lo tawlh hma si, full back Partey chu midfield lamah a lo lut hman tawh si, minute khatna lekah Andreas Pereira chuan goal hmahruai a khung nghal.

Arsenal lamin inkhel thunun chhunzawm viau mah se a pawimawh ber goal an khung thei lo, anmahni muala mualpho thei dinhmunah an ding a, second half-ah erawh inkhel kalhmang a danglam.

Inhnehtawk

Arteta-a'n Kai Havertz leh Partey te la chhuakin Fabio Vieira leh Oleksandr Zinchenko a dahlut a, an ball inpek a rangin an goal nawr pawh a na zual sawt.

Vieira chuan penalty hlawh chhuakin si phurh sut nan Saka-a'n a khung a, goal an khung aṭanga minute hnih hnuah Vieira bawkin substitute Eddie Nketiah tan a siamsak leh bawk.

Goal hnih an neih hnuah Arteta-a'n khung belh aiin a venhim a thlang zawk a, captain Martin Odegaard la chhuakin defensive midfielder Jorginho a dahlut a, mikhual lamin a nawr na sawt.

Minute 83-naah Fulham defender Calvin Bassey hnawhchhuah a nih avangin Arsenal dinhmun a ṭha zual, mahse hun tawp dawnah Joao Palhinha chuan corner aṭanga ball kal khungin team pahnih an inhnehtawk daih.

Eng nge an sawi?

Chak zo lo mah se Arsenal manager Arteta chuan season hmasa aiin an ṭha zawk tih a sawi. Spanish manager chuan, "Goal nga aṭanga goal sarih vel chu khung thei tur kan ni, thil engkim kan tih hnua goal kan chhuah kha a pawi.

"Season hmasa kan team nen ka khaikhin a, tunah chuan a let 10-in kan ṭha tawh zawk," a ti a, a tir lama tihsual an nei zauh zauh hliah khuh tura beih let chu a hautak a tih thu a sawi chhuak bawk.

Fulham manager Marco Silva chuan, "Kan dan thar hman hi a buaithlak hle, Bassey-a'n yellow card a hmuhna hmasa kha hriatthiam a harsa, ball theh (throw) tur khan hun a la rei lo. Thomas Partey-a'n hun a khawhral aiin a rei lo.

"Mahse, hremna a tawk miau si, kan insiamrem a ngai dawn hle a ni," a ti a, point an hmuh avangin a lawm tih a sawi bawk. Silva hian Arsenal chu season hmasa aiin an ṭha zawk tih a pawm a, champion rinkai zinga mi an nih thu a sawi bawk.