MLS-ah pawh Messi leh goal bawk

Lionel Messi leh goal a la inzawm zel, nimin zing khan Argentina captain hian Major League Soccer (MLS) atana a match hmasa ber khelin goal a khung leh nghal.

Inter Miami hian forward Messi leh Diego Gomez te goal khat ve ve hmangin New York Red Bulls chu 2-0 in an hneh.

Tun hnaiah Inter Miami hian match an khel hnem a, nimin zing inkhelah an captain Messi hi a tir aṭangin a lut lo. Stadium khata fans pungkawmte chu, “Messi kan duh, Messi kan hmu duh” tiin an au rual a, Argentina captain hmuh an phut hi a mak lo. Red Bull Arena-a entu tam ber ṭum a ni a, fans 26,276 an awm. Ticket man tlawm ber pawh $480 a ni a, India pawisa chuan cheng sing li vel daih a ni.

En man an tipung a, entu an tam zawk - Messi nghawng a ropui. Mipui pawhin an duh ang ngeia Messi an hmuh bakah an duhthusam tikim turin goal a rawn keng tel leh bawk. Inter Miami tan Messi hian match kuaah goal 11 a khung a, assist vawi thum a nei. Table mawngphaha awm ṭhin Inter Miami kha vawi riat an chak leh chuan playoff an khel thei dawn.

Messi leh a ṭhiante pahnih Jordi Alba leh Sergio Busquets te an neih chinah Inter Miami hi an danglam takzet - Leagues Cup nomawi an chawi bakah US Open Cup final an lut tawh bawk, an result ṭha hi league-ah an chhawm nung.

MLS-ah pawh point thum an hmu leh ta a, eastern conference table mawngphah luahtu an nihna an chhuahsan. Tun hnaia an harh thar avangin team dang tana hmachhawn châkawm lo zinga mi an ni tawh - August 31, Ningani zing dar 5:00-ah Nashville nen an inkhel leh ang.