Chanmari chak mah se an lawm lo

Zote Toyota Mizoram Premier League Season 10-ah Chanmari FC chuan Inrinni chhun khan FC Venghnuai chu 4-3 in an hneh. CFC hian player thar R. Laldanmawia an captain tir a, Sialhawk tlangval hi inkhelh zawh tawh hnuah red card pek a ni. Referee thutluknaah Chanmari an thinur hle.

Venghnuai hi coach Lalthlamuana'n training a neih avangin a telpui thei lo a, MPL9 finalist hian team enkawltu ber coach tel loin season an ṭan. Chanmari FC erawh an kim ṭha a, coach K. Malsawmkima hoin bul pawh an ṭan ṭha.

Chanmari tan Laltlanzova'n a theihna a pho chhuak ta a, I Day Football-ah MPL9-a Chawnpui FC champion puitu forward Zozoa hi khel ṭha tawk lo mah se MPL10-ah erawh minute 23-na lekah goal a khung. Venghnuaiin an hneh lo hret a, amaherawhchu captain C. Ramdinmawia freekick hmangin minute 41-naah an sut.

Venghnuai hi an ṭang tluan thei lo, halftime hmain Lunglei rawlthar Lalrosanga Hrahsel hmangin Chanmariin hma an hruai nawn. Second half-ah pawh Chanmari bawk an chungnung a, Danmawia cross mawi zet chu Lalkhawpuimawia'n a khung. Champhai tlangval Zozoa pawhin minute 72-naah box pawn aṭangin a khung leh bawk.

4-1 a nih tak avangin Venghnuai beiseina a boah a ngaih theih. Mahse, Venghnuai captain Ramdina'n ṭum hnih ngawt penalty rawn hlawh chhuakin goal-ah a chantir ve ve. Chanmari goalkeeper a talbuai bawk avangin hun tawp lamah Venghnuai lamin beiseina an nei a, Mala hote an ṭang tluan hram.

Penalty vawi hnihna hi injury time-a thleng a ni a, hnung lam aṭanga Chanmari player-in Ramdina an nam avangin referee-in penalty a pe. Amaherawhchu Chanmari lam hian ball awmna a san avang leh a nam na loa an ngaih avangin penalty-ah an ngai lo. Captain Danmawia chuan, "Dik takin ham ta che," tiin referee a ṭawng khum a, yellow card vawi hnihna hmuin red card an pe.

Chanmari FC hian Danmawia 'red card' hmuh hi sut leh turin ziakin dilna an thehlut nghal. MPL Board lamin an pawmsak lo a nih chuan Sialhawk Express hi Project Veng FC an hmachhawn hunah a inlan thei lo ang.