Police-in Chhhinga Veng lakah point 3 an hmu

Mizoram Police-in I Day Football-a an hneh loh Chhinga Veng laka point thum hlawh chhuak turin tha an seng lo. I Day Football champion Chhingcows hian inkhelh hmaa player registration an tihfel hman loh avangin match commissioner-in khel tlakah a ruat lo a, 3-0 a chak loh tir an ni.

MPL hi season kua khelh zawh a ni tawh a, 'match forfeit' hi a la awm ngai lo. Zote Honda MPL10-ah MPL history-a a vawi khat nan match forfeit a thleng a, inkhel hmuhnawm en tuma RG Stadium pantute an beidawng hle.

India ramah hian player ziah luh nan Centralised Registration System (CRS) hman a ni a, inelna buaipui nan hian Competition Management System (CMS) hman a ni leh bawk. CRS leh CMS hi thil kalkawp a ni a, CRS-a awm lo player chu CMS-ah dah luh theih a ni lo.

Mizoramah pawh CRS leh CMS te hi hman a ni tawh. CRS-a inziaklut apiang hi AIFF-in a hriatpui ve zel a ngai. Tun ṭuma Chhingcows buaina sawifiah awl nan an player thar zinga mi pakhat Vanlalbiaa Chhangte hi a hman theih ang.

Mabiaa hi season liam ta khan Sreenidi Deccan-ah a khel a, Telangana Football Association hnuaia club a ni. Chhinga Vengin Mabiaa la lut tur hian CRS hmangin Sreenidi hi an dil ang a, NOC an thil tel a ngai. Sreenidi-in an pawm hnuah Chhinga Vengin Inter State transfer fee te an pe fel ang a, Telangana FA-in an pawmpui leh ang a, AIFF a thleng chiah ang. AIFF-in document a fel leh fel loh an enfiah leh ang a, a fel chuan an lo pawmsak dawn.

AIFF lam hian enfel loh an ngah avangin tunah hian nghah lai (pending) a tam hle. Hei vang hian MPL Board chuan club-te chu player list bakah player dinhmun sawifiahna thehlut turin an hriattir a, AIFF-a pending chin chu khelhtir an phalsak. MPL club pariat zingah Chhinga Veng chauhin an thehlut lo.

Chhingcows hian an thehluh loh avangin player dinhmun an hre lo a, Police hmachhawn tur zinga dahluh Mabiaa dinhmun hi CRS-a endik niin Telangana FA-in an la pawmpui lo a, AIFF a la thleng lo tih hmuh a ni. Player dang fel lo ṭhahnem tak an awm bawk avangin Chhingcows hi Police hmachhawn thei lo turin an hrem.

MFA hruaitu zinga mi pakhat chuan, "I Day Football-ah kan inhrethiam tawh a, hremna lekkawh a nih loh chuan dan pal zut dan hi an zawng zel dawn. Chuvangin hremna lekkawh hi a ṭul a ni," tiin a sawi.

Chhinga Veng erawh thuneitute thutluknaah an lawm lo a, point thum hlohna tawp turah an ngai lo - inkhelh kalpui theih dan awmah an ngai. Chutihrualin thutlukna avanga an thinur avangin hremna chungchang erawh an sawi zui duh lo thung.