Forest lakah Man United an 'comeback'

Manchester United tan Old Trafford-a Nottingham Forest hneh chu inchhuanna chi a ni lo a, amaherawhchu Inrinni zanah erawh minute li chhunga goal hnih an chhuah hnua tho chhuak an nih avangin an hnehna chan hi a hlu bik hle.

Forest-in Taiwo Awoniyi hmangin minute hnihna lekah an khung a, minute hnih hnuah Willy Boly hmangin an khung belh leh bawk. Old Trafford-ah mikhual ṭantute lawm hman viau mah se Man United tan captain Bruno Fernandes a rawn khel ṭha a; Christian Eriksen, Casemiro leh Fernandes te hmangin 3-2 in an chak.

Tlarhnung pawp

Man United hian match hmasa thum an khelh tawh aṭangin goal li an chhuah a, ṭum khat clean sheet nei mah se Wolves an hmachhawn ṭumah pawh tlarhnung a nghing nasa hle.

Harry Maguire chu khelhna hun pek a nih loh avangin captain hlui hi sawisel theih a ni tawh lo a, mawhphurtu chu Ten Hag a ni ta. United corner kick pet aṭangin Awoniyi-a'n goal a khung a, Rashford-a'n Forest striker hi tharumah a ngam lo. English forward ber kher hi ti nge a awm tih hi zawhna chu a ni.

Goal hnihna hi set piece aṭangin a ni a, Boly tauh goal tur hi Casemiro-a'n a veng hneh lo. United-in goal dang chhuah lo mah se an tlarhnung erawh a nghing chhunzawm.

Mawhphurhna latu captain

Tun season aṭanga captain ngheta ruat Bruno Fernandes-a'n hun harasaah mawhphurhna pawimawh a rawn la. Spurs laka che chhia Fernandes chu 'comeback-na' kawnga player pawimawh a ni.

Fernandes ball pet kawh ṭha chu Matt Turner-a'n nam perin Marcus Rashford-a'n a chang a, English forward hian ṭha taka a lakluh hnuah a cross chu Christian Eriksen-a'n minute 17-naah a khung.

United hi vannei ni se, first half-ah siphurh sut zo thei an ni. Casemiro-a'n goal ruakah a khung lo. Mahse, Brazilian midfielder hian a tihsual thup nan minute 52-naah siphurh a sut. Ten Hag-a naute freekick a class takzet a; an inpek kual dan chu Bruno - Rashford - Bruno - Casemiro a ni a, Forest tlarhnung an hawi buai hle.

United an vannei a, Forest defender Joe Worral chu Fernandes tihtluk vangin hnawhchhuah a ni. Mualneitu hian player 10-a khel Forest lakah penalty an hmu a, Rashford-a hlawhchhuah chu Fernandes-a'n chakna goal khung nan a hmang.

Ten Hag-a hote hian point thum hlawh chhuak mah se insiamṭhat an la mamawh hle. Forest kim lo an hmachhawn chungin hun tawp lamah an talbuai a, 3-2 in an chak hram.