US Open atan Novak Djokovic a inpeih

Tennis season khat chhunga Grand Slam hnuhnung ber US Open chu zanin aṭangin khelh ṭan a ni dawn a, world number 2 Novak Djokovic chuan inelna lian hmachhawn tura a inpeih thu a sawi.

Season hmasa khan Djokovic hian US Open a khel thei lo. Covid-19 laka inevenna damdawi a lak duh loh vang a ni a, vaccine la lo tan US ramah a zin luh theih loh, hei vang hian inelna dang pawh a hmachhawn lo.

Tunah chuan khualzin inkhuahkhirhna a danglam tawh a, zalen takin Djokovic pawh a zin thei tawh. Serbian star chuan, "A nihna takah chuan tournament an khelh lai khan rilru a hrehawm duh hle.

"Kuminah erawh harsatna ka nei ta lo, hun kal liam tawh ngaihtuah loin a ṭha thei ang bera tournament khelh ka tum dawn, thil dang ngaihtuahna hun a awm lo," tiin a sawi.

Djokovic hian Grand Slam title 23 a nei tawh a, champion hnem lamah Rafael Nadal (22 titles) a khum tawh a, record ṭha ber a neih lai hi sawhngheh theihna remchang a nei dawn.

A tan hun ṭha a nih rualin thil a awlsam vek dawn bik lo, world number 1 Carlos Alcaraz chu a elpui hautak tur a ni dawn - Spanish star hi champion lai a ni a, hmanni lawk khan Cincinnati Open final hautak zet an khel dun bawk.

Kum 36 mi Djokovic chuan, "Cincinnati kan khelh kha a hautak takzet a, mahse lawmna tak ka nei. A chhan chu inkhel hautak hmachhawn turin ka la ṭha tawk a ni tih ka fiah," tiin a sawi.

US Open vawi thum champion tawh Djokovic hian a match hmasa ber atan Thawhlehni zingah Alexandre Muller a tum dawn, a chak a nih chuan world ranking chhuak tharah pakhatna a ni lehnghal ang.

Hard court inelna lian a ni a, chuvangin Daniil Medvedev sawi hmaih a thiang lo. Russian tlangval hian clay leh grass-ah inkhelh a harsat a, hetihlai hian hard court-ah erawh player hlauhawm berte zinga mi a ni.

Seeded pathumna Medvedev chuan, "Champion tura rinkai leh media lam chaw tui ber kan ni lo hi a lawmawm, a chhan chu nuam ti leh engthawl takin ka khelh theih phah dawn," a ti.

Medvedev hian US Open 2021 nomawi a chawi a, final inkhel hmuhnawmah Djokovic a hneh a nih kha, kuminah pawh player hlauhawm a ni leh dawn - Thawhlehni zingah a bul ṭan nan Attila Balazs a tum ang.

Hun kal tawh thlir kirin Medvedev chuan, "Kum hnih liam taa US Open ka khelh kha ka la hre reng, tennis ka khelh tawh zinga a ṭha ber chu a ni kher lo mai thei, mahse hriat reng hlawh tur a ni. Khatiang bawka chet leh kha ka tum," a ti.

Andy Murray pawhin a bul ṭan nan Corentin Moutet a hmachhawn dawn a, inelna lian hmachhawn turin British tlangval a inpeih tawh a, hnehna chan ngei pawh a inbeisei hle.

World number 1 hlui Murray chuan, "Dul hliam vangin Toronto Masters leh Cincinnati Open ka khel thei lo a, inelna lian US Open atan duhthusama ṭhain inbuatsaihna chu ka nei thei lo.

"Mahse, New York khawpui hi ka hrechiang a, tunhma pawha hnehna ka lo chan fo tawhna a nih avangin ka zam lo. Thil erawh a awlsam dawn lo, tournament khel hah loa ka lo chawlh tawhna kha hman ṭangkai ka tum ang," a ti.

Hmeichhe lamah chuan Iga Swiatek chu champion tura rinkai ber a ni leh dawn. World number 1 hi seeded pakhatna pek a ni a, Polish nula hian a bul ṭan nan Rebecca Peterson a hmachhawn ang.

American miten Coco Gauff an ṭan dawn. Kum 19 mi Gauff hian Cincinnati Open nomawi a chawi thei a, inrintawkna sang tak a neih lai a ni a, a vawi khat nan Grand Slam champion nih a tum dawn a ni.