Chelsea an chak ve ta

Team indinthar leh mek Chelsea chuan tun season Premier League match thum an khelhnaah chak ni hmel an hmu ve ta - Zirtawpni zan inkhelah an mikhual Luton Town chu 3-0 in an hneh.

Raheem Sterling-a'n goal hnih a khung bakah Nicolas Jackson chuan goal khat a khung a, kai thar Luton lamin a chhanletna tur an nei lo.

Mauricio Pochettino tan Blues manager a nih hnuah EPL-a a chakna hmasa ber a ni. Season hmasa lama beisei phak lo Sterling a chet ṭhat bawk avangin London club tan a lawmawm zual ngei ang.

England international Sterling chuan, "Tun season chu Chelsea tana goal khung hnem ber nih ka tum a, chutiang tur pawh chuan theihtawp ka chhuah ang. Ka ti thei ngei ang tih pawh ka ring," a ti.

Sterling hian mual sirah ball a chang a, a hmaah Luton player pali ngawt la ding mah se huaisen takin box chhungah ball a la lut, chep zet aṭangin goal hmahruai a khung, a goal hnihna khung tur pawhin awm hmun tur a thlang dik hle.

Manchester City forward hlui hian theihna sang tak a nei a, mahse Chelsea a pan hnuah beisei a phak lo, a theihna ang taka a khel chhuak leh a nih chuan Poch tan pawh chanchin lawmawm a ni ang, tawnhriat a neih tamna chu an chhawr ṭangkai tur a ni bawk.

Player man tam Moises Caicedo-a'n inkhel bul a ṭan a, a match hmasa lam aiin a khel ṭha tawh zawk, a hma hreta awm Enzo Fernandez nen an inkawp rem thuaiin a rinawm a, manager Poch-a'n a rem fuh a nih phawt chuan EPL club dang tan tawh an khirh khawp ang.

Blues hian league match vawi thum an khelh aṭangin point li an hmu a, table-ah pakuana dinhmun an luah, team indinthar leh mek an nih avangin champion an tum ngam rih lo mai thei a, a sang zual pali zinga tel phak ngei erawh an tum ruh hle ang.

August 30, Nilaini zanlaiah AFC Wimbledon nen EFL Cup second round an khel dawn a, kartawpah Nottingham Forest nen Stamford Bridge-ah an intawng zui leh nghal dawn a ni.